«Սովորաբար նոր ինստիտուտների կայացման առաջին տարին բավականին բարդ ու խրթին է լինում: Մենք ունեցել ենք առնվազն 10 վարույթ, բազմաթիվ դիմումներ, հարցումներ: Վարույթների քննության արդյունքում ունենք նաեւ պատասխանատվության ենթարկված բուժաշխատողներ: Մի շարք դեպքերում էլ հաստատվել է, որ բուժաշխատողների մասնագիտական էթիկայի կանոնների խախտումներ են արձանագրվել, բայց չի առաջարկվել նրանց ենթարկել պատասխանատվության»,- «Արմենպրեսի» մամուլի սրահում կայացած ասուլիսում նշեց Բուժաշխատողների մասնագիտական էթիկայի կանոնների խախտումները քննող հանձնաժողովի նախագահ Իզաբել Աբգարյանը (լուսանկարում)։
Նրա խոսքով. «10 վարույթի արդյունքում 5 բուժաշխատող ենթարկվել է պատասխանատվության, իսկ 5-ի մոտ չեն հաստատվել մասնագիտական էթիկայի կանոնների խախտումների դեպքերը: Մենք առողջապահության նախարարության խողովակներով ուղարկել ենք բուժհաստատությունների տնօրինություններին, որպեսզի իրենց կողմից աշխատանքային օրենսդրությամբ սահմանված կարգով կիրառեն կարգապահական պատասխանատվության միջոցներ»:
Իզաբել Աբգարյանն ընդգծեց, որ իրենց հանձնաժողովի նպատակը բուժաշխատողներին պարտադիր պատասխանատվության կանչելը չէ. «Դա մեր գործի վերջին, թերեւս, ամենացավալի մասն է: Հիմնական մասը վերաբերում է նրան, որ մեկ գործի քննության արդյունքում վարքագիծ փոխվի առնվազն տվյալ բուժհաստատությունում, այսինքն՝ որոշումը գնա բուժհաստատություն, քննարկվի բուժհաստատությունում բոլոր բուժաշխատողների շրջանում, բարձրաձայնվեն խնդիրները:
Մեր կողմից կայացվող որոշման պարագայում շատ երկար եւ մանրամասն քննարկվում է դեպքը, վարքագծի դրսեւորումը, գնահատական է տրվում: Մենք պարզապես չենք ֆիքսում խախտման առկայությունը կամ բացակայությունը, այլ բացատրում ենք, թե որն է խախտման բուն էությունը: Հանձնաժողովի համար սա է առանցքայինը՝ վարքագիծ փոխելը»:
Կարդացեք նաև
Գոհար ՀԱԿՈԲՅԱՆ
