«Մենք Գյումրիում չենք պարտվել, որովհետեւ այն արդյունքները, որոնք ՔՊ կուսակցությունը գրանցել է, միանշանակ հաղթանակի նշան է․ 17 200 քվե ստանալը գյումրեցիներից այդքան էլ հեշտ չէ»,- կառավարության այսօրվա նիստից հետո լրագրողներին ասաց Շիրակի մարզպետ Դավիթ Առուշանյանը։
Նա ասաց, որ հրաժարական չի ներկայացնելու, բարձր ճակատով քայլել է ու շարունակելու է քայլել Գյումրիում։ Առուշանյանն ասաց, որ քաղաքը կառավարում է ավագանին, ՔՊ-ն ունի 14 մանդատ եւ ամենամեծ խմբակցությունն է։
Հարցին, թե ՔՊ-ն քաղաքապետի թեկնածու առաջադրելո՞ւ է, մարզպետը պատասխանեց․ «Թեկնածուի մասով մոտ օրերս մանդատները վերցնելուց հետո կլինի պաշտոնական հայտարարություն, այդ ժամանակ կիմանաք։ Մենք սպասում ենք մանդատները վերցնելուն, որովհետեւ մինչեւ ամսի 14-ը դեռ ինքնաբացարկի ժամանակ կա։ Հասկանանք՝ մանդատներն ովքեր են վերցնելու եւ ինչ դիրքորոշում կունենան հայտնելու։ Իհարկե, մյուս ուժերը հայտարարել են, որ սատարելու են Վարդան Ղուկասյանին, եւ 14-ից հետո հստակ պարզ կլինի»։
Դավիթ Առուշանյանը հավելեց, որ փաստորեն ընտրություններին մասնակցած մյուս ուժերը մոլորեցրել են հանրությանը։ «Երբ որ մենք ասում էինք, որ բոլոր ուժերն իրար հետ են ու բոլոր ուժերին ձայն տալով՝ վերջում այդ ձայնը տալու եք մեկ թեկնածուի, այդ ժամանակ բոլորն ասում էին՝ ոչ, ՔՊ-ն փորձում է մանիպուլացնել, մենք իրար ձայն չենք տալու, մեր ձայները պահելու ենք։ Հիմա դա ապացուցվեց։ Մեր ՔՊ թեկնածուն, մեր Սարիկը երկրորդ տեղն ընկած թեկնածուից գրեթե երկու անգամ ավելի ձայներ է հավաքել, արդար չէ ուղղակի, չի կարող, որ քաղաքացիները 17 200 ձյան տան մեկ ուժի, եւ 2-3 հազար ձայն հավաքողները հավաքվեն 4-5 հոգով, որոշեն, թե ով է լինելու Գյումրու քաղաքապետը»,- ասաց նա։
Կարդացեք նաև
Մանրամասները՝ տեսանյութում
Ռոզա ՀՈՎՀԱՆՆԻՍՅԱՆ
