«Էդ ելույթը մի նպատակ ուներ, նախ սիրո հեղափոխություն եղել է մի անգամ՝ 60-ականներին՝ սեռական հեղափոխություն։ Հետո կբացատրեմ»,- ՀՀ ԱԺ ամբիոնից հայտարարեց ՀՀ ԱԺ «Հայաստան» խմբակցության պատգամավոր Արթուր Խաչատրյանը՝ անդրադառնալով ՀՀ վարչապետ Նիկոլ Փաշինյանի՝ խորհրդարանում հնչեցված ելույթին։
ՀՀ ԱԺ նախագահ Ռուբեն Ռուբինյանն արձագանքեց․ «Սեռական չէ, սեքսուալ հեղափոխություն էր»։
Արթուր Խաչատրյանը, անդրադառնալով Նիկոլ Փաշինյանի՝ թալանը վերադարձնելու մասին պնդումներին, ասաց․ «26 րոպե խոսեց թալանը հետ բերելու մասին։ «Գոլդեն Փելըսի» մասին շատ է խոսվում, «խեր-խաբար» կա՞, գործո՞ւմ է, ինչքա՞ն փող է բերել, որովհետև տուրիստները նվազել են։ Ո՞նց եղավ, որ գնեց մի մարդ շատ ավելի էժան, ո՞նց եղավ, որ այդ նույն մարդը գնեց Հովիկ Աբրահամյանի տունը։ Հրաշափառ հրամանով տան կալանքը վերացավ, վաճառվեց։ Տեսնո՞ւմ եք՝ ինչ լավ հարստանալու մեխանիզմ եք ստեղծել»։
Կարդացեք նաև
Ռուբեն Ռուբինյանը՝ դիմելով Արթուր Խաչատրյանին, ասաց․ «Ավարտեք, պարոն Խաչատրյան, Ձեր ժամանակը վաղուց սպառվել է»։
Արթուր Խաչատրյանը արձագանքեց․ «Պարոն Ռուբինյան, կարծում եմ՝ պիտի տենց գոռաք Քըլըչի վրա, ասեք՝ մի տարի է խոստացել եք, որ կբացեք ճանապարհը, ինչի՞ չեք բացում»։
Ռուբեն Ռուբինյանն էլ ի պատասխան ասաց․ «Երբ ձեր կուսակցությունը 1918-ին իշխանություն էր, տեսանք՝ ում հետ ինչ էիք խոսում, ու դա ինչի բերեց, ձեր էժան տրյուկները չեն անցնում»։ Արթուր Խաչատրյանն էլ ասաց՝ էժան ձեր ամեն ինչն է։
Տաթև ՀԱՐՈՒԹՅՈՒՆՅԱՆ
Լուսանկարում՝ 2024 թ. հուլիսի 30-ին Հայաստան-Թուրքիա սահմանին՝ Մարգարա-Ալիջան անցակետում Ազգային ժողովի նախագահի տեղակալ Ռուբեն Ռուբինյանի և հայ-թուրքական հարաբերությունների կարգավորման թուրքական կողմի հատուկ ներկայացուցիչ, դեսպան Սերդար Քըլըչի գլխավորած պատվիրակությունների հանդիպումը:
