Ինչպես արդեն տեղեկացրել ենք՝ արցախցիներն այսօր հավաքվել էին Արցախի ներկայացուցչության մոտ՝ հանդիպում պահանջելով Արցախի իշխանության ներկայացուցիչների հետ։ Արցախցի գործիչ Արթուր Օսիպյանը հայտարարել էր՝ քանի որ Գլխավոր դատախազությունը հասարակ արցախցիներին չի ընդունում, ժողովուրդը պահանջում է, որպեսզի Արցախի նախագահ Սամվել Շահրամանյանն իրենց հետ գնա դատախազություն եւ պարզի, թե ինչ աշխատանք է տարվում արցախցիներից թալանած գումարը վերադարձնելու ուղղությամբ։
Արցախի ներկայացուցչությունում այսօր արցախցիներին չեն ընդունել, ասել են, որ Սամվել Շահրամանյանը տեղում չէ, բայց ապրիլի 18-ին կհանդիպի արցախցիների հետ։ «Հստակ է՝ թալանածը պետք է վերադարձնեն, սկսում ենք մեր ներկայացուցչությունից, հետո գնալու ենք ըստ անհրաժեշտության։ Դրա համար ամսի 18-ին՝ ժամը 12-ին Արցախի ներկայացուցչության դիմաց ենք հավաքվում։ Սամվել Շահրամանյանը ներողություն է խնդրել, որ այս անգամ չի կարողացել գալ եւ խոսք է տվել, որ ամսի 18-ին ինքն այստեղ է լինելու եւ ժողովրդի հարցերին պատասխանելու է։ Ամեն ինչ լինելու է հրապարակային, ամեն ինչ պետք է լսելի լինի հասարակության համար, դրա համար կոչ ենք անում բոլոր արցախցիներին ամսի 18-ին լինել այստեղ»,- ասաց Օսիպյանը։
Արցախցիները կոչ արեցին, որ իրենց միանան նաեւ հայաստացիները։ «Հայաստանի ժողովուրդն ասում են՝ թող արցախցիները գնան Արցախի ղեկավարությունից պահանջեն, ճիշտ եք ասում, եկեք մեր կողքը կանգնեք։ Հարցը լուծելու համար պետք է համազգային համախմբում լինելու՝ արդար լուծման հասնելու համար։ Մեզ համար անուն-ազգանուն չկա, ով թալանել է, պետք է պատասխան տա։ Իսկ ՀՀ դատախազությունն անուն-ազգանունները բոլորից լավ գիտի։ Մեր խնդիրն է, որպեսզի ՀՀ դատախազությունը սկսի այդ գործով իրականում զբաղվել։ Իմիջիայլոց, այդ հիմնադրամի թալանը որ բացում ենք, այնտեղ մեծ մասը ոչ արցախցիներն են, բայց արցախցիներն են կան ու խոշոր գումարներով»,- նշեցին նրանք։
Ռոզա ՀՈՎՀԱՆՆԻՍՅԱՆ
