«Երեսպաշտությունը սպանում է քաղաքականությունը»,- խորհրդարանում հայտարարեց ԱԺ փոխնախագահ Ռուբեն Ռուբինյանը՝ անդրադառնալով ՀՅԴ-ին վերաբերող իր քննադատություններին եւ պնդելով, որ այդպիսով ինքը քննադատում է երեսպաշտությունը։
«Պետական գործունեության մեջ ամենակարեւոր բանը հետեւողականությունն է ու երբ մի ուժ մեղադրում է մեկ այլ ուժի զուտ Թուրքիայի հետ բանակցելու համար, այդ ուժը գոնե պետք է երեսպաշտ չլինի, եթե ինքն այդ նույնն արել է, ինքը զրկվում է այդ իրավունքից»,- ասաց Ռուբեն Ռուբինյանը՝ հավելելով, որ երբ ՔՊ-ն իշխանության չլինի ու հաջորդ իշխանությունները բանակցություն վարեն Թուրքիայի հետ, ինքն իրավունք չի ունենա ասելու՝ ինչո՞ւ եք բանակցում Թուրքիայի հետ։ Չնայած, հուսով է, որ դրա կարիքն էլ չի լինի, քանի որ ամենն արդեն ՔՊ-ն կարգավորած կլինի։
Նա պատասխանեց «Հայաստան» խմբակցության պատգամավոր Աննա Գրիգորյանին․ «Երբ խոսում եք «պադավատների» մասին, ձեր ցավը տանեմ, երբ մենք 2019-ին եկանք այս շենք, դուք էլ մեր հետ նույն ցուցակում էիք, ես եմ հարցազրույց անցկացրել ձեր հետ․ ասացի՝ շատ տաղանդավոր կին է, պետք է մտցնել ցուցակ։ Տաղանդի մասով չեմ փոշմանում, բայց հետեւողականության մասով խնդիրներ կան։ Մենք եկանք, հանեցինք մի շարք ծառայողական մեքենաներ, ախր, պետք է հետեւողականություն ունենալ»։
Նա առաջարկեց՝ սկսել նախկին նախագահներից եւ նրանց հորդորեց՝ հրաժարվել պետության կողմից տրամադրված ծառայողական մեքենաներից։
Կարդացեք նաև
Մանրամասները՝ տեսանյութում
Հիշեցնենք, խորհրդարանում քննարկվում է կառավարության 2021-26 թվականների ծրագրի՝ 2024 թվականի ծրագրի կատարման ընթացքը։
Նելլի ԳՐԻԳՈՐՅԱՆ
