Գեղարքունիքի մարզի առաջին ատյանի ընդհանուր իրավասության դատարանի Սևան քաղաքի նստավայրում Ազատ գյուղի զինվորական կացարանում զոհված 15 զինծառայողների գործով այսօր հարցաքննված երկու վկան, փաստաբան Նորիկ Նորիկյանի տպավորությամբ կաշկանդված էին:
«Փորձում էին խուսափողական պատասխաններ տալ առաջադրված հարցերին: Մեկ անգամ եւս ինձ մոտ ընդգծվում է համոզմունքը, որ յուրաքանչյուր վկայի ցուցմունքը հակասում է այլ վկաների ցուցմունքներին: Վկաները փորձում էին այնպիսի պատասխաններ տալ, որոնք հեռացնում են իրենցից իրենց պարտականությունների ծավալը: Եվս մեկ անգամ հիմնավորվեց, որ մինչեւ ողբերգական դեպքը վերադաս հրամանատարության կողմից, առանձին սպայական կազմի ներկայացուցիչների կողմից չեն իրականացվել այնպիսի ստուգումներ, որոնք հնարավորություն կտային կանխել այս ողբերգությունը».- դատական նիստի ավարտից հետո այսօր Aravot.am-ին ասաց տուժողների ներկայացուցիչ, փաստաբան Նորիկյանը:
Կարդացեք նաև
Անդրադառնալով այսօրվա վկաներից փրկարարի ցուցմունքին՝ պարոն Նորիկյանը նկատեց. «Եվս մեկ անգամ գալիս ենք համոզման, որ դեպքի վայրը կոպտորեն խախտվել է: Արտակարգ իրավիճակների նախարարության (ԱԻՆ) աշխատակիցները, չունենալով իրավասություն կամ ցուցում-հրաման կատարելով, առանց քրեադատավարական ընթացակարգի դուրս են հանել զոհվածների դիերը: Պատճառաբանությամբ, որ հնարավոր է այդ տարածքում ողջ մնացած զինվոր լինի: Սա որեւէ քննադատության չի դիմանում: Այն փաստերը, որոնք առկա են՝ հրդեհի ծավալը, օգտագործված ջրի քանակը, տալիս է հնարավորություն արձանագրելու, որ հրշեջները գրեթե վստահ են եղել, որ այդ տարածքում հնարավոր չէ՝ ողջ մնացած զինվոր լինի: Հակառակ դեպքում 25 տոննա ջուր չէին ներարկի այդ փոքր տարածքում, որ հրդեհաշիջման աշխատանքներ իրականացնեն: Գործ ունենք իրենց պարտականություններից խուսափելու կոնկրետ դրսեւորման հետ: Սա վկայում է այն մասին, որ այս քրեական գործով նախաքննությունն իրականացվել է բազմաթիվ թերություններով, ինչի պատճառով ստանում ենք այսպիսի ոչ լիարժեք պատասխաններ»:
Արփինե ՍԻՄՈՆՅԱՆ
