«Թմրամիջոցը գտնվում է ԱԱԾ-ում, այն առկա է և չի ոչնչացվել»,-հարցին՝ ի՞նչ է եղել 800 կգ կոկաինը, որն առգրավվել է, Պետական-իրավական հարցերի մշտական հանձնաժողովի նիստի ընթացքում այսպես պատասխանեց Քննչական կոմիտեի նախագահ Արթուր Պողոսյանը։
Հանձնաժողովի նախագահ Վլադիմիր Վարդանյանն էլ հումոր արեց՝ պատասխանեք, պրծնենք, էլի։
Արթուր Պողոսյանն ասաց․ «Զարմանում եմ, որ տենց հարց է բարձրացվում, թե ինչու չի ոչնչացվել։ Օրենքով իրեղեն ապացույցը կարող է տնօրինել միայն դատարանը։ Այս փուլում քննիչը նույնիսկ իրեղեն ապացույցի տնօրինմամբ չի կարող զբաղվել։ Եթե գործը կարճվում է, քննիչը կարող է տնօրինել։ Բայց եթե գործը պիտի գնա, օրինակ, դատարան, դատարանը կարող է տնօրինել միայն իրեղեն ապացույցը»։
Կարդացեք նաև
Վլադիմիր Վարդանյանն էլ ասաց․ «Ժողովուրդ ջան, որ ոչնչացվեր, գնար դատարան, ասեին՝ ալյուր էր դա, ո՞նց էինք ապացուցելու, որ ալյուր չէր։ Դա մնալու է մինչև դատավճռի՝ օրինական ուժի մեջ մտնելը»։
Տաթև ՀԱՐՈՒԹՅՈՒՆՅԱՆ
