ՀՀ ԳԱԱ ֆիզիկայի և աստղաֆիզիկայի բաժանմունքն ամփոփեց 2024թ-ի գործունեության արդյունքները
Սույն թվականի ապրիլի 22-ին տեղի ունեցավ ՀՀ ԳԱԱ ֆիզիկայի և աստղաֆիզիկայի բաժանմունքի տարեկան ընդհանուր ժողովը, որի ընթացքում բաժանմունքի ակադեմիկոս-քարտուղար ՀՀ ԳԱԱ ակադեմիկոս Ռադիկ Կոստանյանը ներկայացրեց 2024թ-ի գիտական և գիտակազմակերպական գործունեության հիմնական արդյունքները:
Տարեկան ժողովի ընթացքում ներկայացվեցին հետևյալ գիտական զեկուցումները.
- «Խիստ ցրող օբյեկտների օպտիկական թափանցող պատկերագրում» (զեկ.՝ ՀՀ ԳԱԱ թղթակից անդամ Ա. Վ. Պապոյան)
- «Ակտիվ գալակտիկաների բազմալիքային որոնումներ և ուսումնասիրություններ» (զեկ.՝ ֆ.-մ.գ.թ. Ա.Մ. Միքայելյան)
- «Բլազարների ճառագայթման ուսումնասիրությունը մեքենայական ուսուցման ալգորիթմների միջոցով» (զեկ.՝ ֆ.-մ.գ.դ. Ն.Վ. Սահակյան)
- «Ակուստիկ ալիքների ազդեցությամբ նոր բյուրեղների ստացում և աճեցում» (զեկ.՝ ֆ.-մ.գ.թ. Ռ.Պ.Սուքիասյան):
- Հաղորդում ՌՖԷ-ում կատարվող և նախատեսվող կարևոր նշանակության հետազոտությունների վերաբերյալ (զեկ.՝ ֆ.-մ.գ.թ. Տ.Վ. Զաքարյան)
- «Մութ նյութի մասնիկների որոնում Bell II դետեկտորով. տեսության և փորձի համընկնում» (հեռավար զեկ՝ ՀՀ ԳԱԱ արտ. անդամ Ա. Յու. Խոջամիրյան)։
Բաժանմունքի կազմում ընդգրկված են Վիկտոր Համբարձումյանի անվան Բյուրականի աստղադիտարանը, Ֆիզիկական հետազոտությունների, Ֆիզիկայի կիրառական պրոբլեմների, Ռադիոֆիզիկայի և էլեկտրոնիկայի ինստիտուտները և ԻԿՐԱՆԵՏ-Հայաստան միջազգային կազմակերպությունը:
Կարդացեք նաև
Բաժանմունքն ունի 4 ակադեմիկոս, 10 թղթակից անդամ և 22 արտասահմանյան անդամ։ Բաժանմունքի ինստիտուտները ստացել են 3 արտոնագիր։ Գիտաշխատողները տպագրել են 4 մենագրություն, 3 հանրապետական ուսումնական ձեռնարկ, 231 հոդված, 151 թեզիս։ Բաժանմունքի գիտահետազոտական ինստիտուտներն անցկացրել են 29 միջոցառում, այդ թվում՝ սեմինարներ, միջազգային ու երիտասարդ գիտնականների գիտաժողովներ։ Ձևավորվել և գործում են ԳԱԱ Ներդրումային հիմնահարցերի ու Հատուկ նշանակության հիմնախնդիրների մասնագիտական խորհուրդներ: Բաժանմունքը հրատարակում է «ՀՀ ԳԱԱ տեղեկագիր. ֆիզիկա», «Աստղաֆիզիկա», «Armenian journal of physics» ամսագրերը։
ՀՀ ԳԱԱ ֆիզիկայի և աստղաֆիզիկայի բաժանմունքի տարեկան ընդհանուր ժողով որոշեց․
- քննարկել կազմակերպությունների՝ տարիներ առաջ հաստատված թեմատիկայի վերանայման անհրաժեշտությունը՝ հաշվի առնելով արդիականությունը, հանրապետության համար կարևորությունը և կադրերով ապահովվածությունը:
- Կարևորել հիմնարար հետազոտությունների արդյունքների հիման վրա հանրապետության՝ հատկապես անվտանգային և առողջապահական բնագավառներում կիրառման նպատակով հեռանկարային նորարական աշխատանքների իրականացումը:
- Նախատեսել հանրապետական և միջազգային գիտական համագործակցության վերաբերյալ տնօրենների զեկույցներ (5 սեմինար)։
- Կազմակերպել արտասահմանյան գիտնականների սեմինարներ, համատեղ իրականացվող հետազոտությունների արդյունքների վերաբերյալ (8 սեմինար)։
- Ձևավորել նախաձեռնող խումբ տիեզերական հետազոտությունների բնագավառի աշխատանքները համակարգելու, միջգիտակարգային ծրագրեր մշակելու և ՀՀ ԳԱԱ նախագահությանն առաջարկներ ներկայացնելու համար:
ՀՀ ԳԱԱ քիմիայի և Երկրի մասին գիտությունների բաժանմունքն ամփոփեց 2024թ-ի գործունեության արդյունքները
Սույն թվականի ապրիլի 22-ին տեղի ունեցավ ՀՀ ԳԱԱ քիմիայի և Երկրի մասին գիտությունների բաժանմունքի տարեկան ընդհանուր ժողովը: Բաժանմունքի ակադեմիկոս-քարտուղարի ժամանակավոր պաշտոնակատար ՀՀ ԳԱԱ թղթակից անդամ Արթուր Իշխանյանը ներկայացրեց 2024թ-ի գիտական և գիտակազմակերպական գործունեության հիմնական արդյունքները:
Ժողովի ընթացքում ներկայացվեցին հետևյալ գիտական զեկուցումները.
- «Աբովյանի յուրօրինակ մագնետիտ-ապատիտային հանքավայրը Հայաստանում և դրա կապը Երևանի աղային ավազանի հետ» (Уникальное Абовянское магнетит–апатитовое месторождение в Армении и его связь с Ереванским солевым бассейном), զեկուցող` ե.գ.թ. Ն.Ա.Նեկրիլով
- «Հին դեղամիջոցներին՝ նոր կյանք», զեկուցող՝ ք.գ.թ. Շ.Շ.Դաշյան
- «Նորարարական լուծումներ նանոէլեկտրոնիկայում առաջադեմ նանոնյութերի կիրառմամբ», զեկուցող՝ ֆ.-մ.գ.թ. Մ.Ա.Երանոսյան
- «Ցինկսիլիկատային ֆոտոկատալիզատորների միկրոալիքային սինթեզ», զեկուցող՝ կ. գ.ա. Ա.Ս.Պետրոսյան
ՀՀ ԳԱԱ քիմիայի և Երկրի մասին գիտությունների բաժանմունքի կազմում ընդգրկված են Արամ Նալբանդյանի անվան քիմիական ֆիզիկայի, Մանվել Մանվելյանի անվան ընդհանուր և անօրգանական քիմիայի, Երկրաբանական գիտությունների, Արմենակ Նազարովի անվան երկրաֆիզիկայի և ինժեներային սեյսմաբանության ինստիտուտները, Օրգանական և դեղագործական քիմիայի գիտատեխնոլոգիական կենտրոնը (Օրգանական քիմիայի, Արմենակ Մնջոյանի անվան նուրբ օրգանական քիմիայի ինստիտուտներ, Մոլեկուլի կառուցվածքի ուսումնասիրման կենտրոն):
Բաժանմունքն ունի ԳԱԱ 5 ակադեմիկոս, 5 թղթակից անդամ և 16 արտասահմանյան անդամ: 2024թ․ բաժանմունքի ինստիտուտների կողմից տպագրվել է 202 հոդված, 84 թեզիս, 5 մենագրություն և 2 ուսումնական ձեռնարկ: Ստացվել է 11 արտոնագիր։
Անցկացվել է 4 ընդհանուր ժողով, հանձնաժողովի 1 և բյուրոյի 14 նիստ, 5 խորհրդակցություն, ԳԱԱ սեյսմաբանության, սեյսմակայուն շինարարության, բնական և տեխնածին աղետների հիմնախնդիրների պրոբլեմային խորհրդի ենթահանձնաժողովի 2 նիստ: Պրոբլեմային խորհրդի ենթահանձնաժողովի նիստերում քննարկվել են «Էկոատոմ» ՍՊԸ-ի ներկայացրած «Նաիրիտ գործարան» ՓԲԸ-ում առկա լաք էթինոլի օգտահանման տեխնոլոգիան, հավանության է արժանացել ներկայացված տեխնոլոգիան գործնականում ներդնելու առաջարկությունը, «Փի Էս Այ» ՍՊԸ-ի մշակած սենսորային տեխնոլոգիան ու դրա կիրառությունները (հիմնականում սահմանների հսկման համար), հավանության է արժանացել առաջարկվող սենսորային տեխնոլոգիան։
ՀՀ ԳԱԱ քիմիայի և Երկրի մասին գիտությունների բաժանմունքի տարեկան ընդհանուր ժողովը որոշեց դրական համարել բաժանմունքի 2024թ. գործունեությունը:
ՀՀ ԳԱԱ գիտության հանրայնացման և հասարակայնության հետ կապերի բաժին
