Լրահոս
Օրվա լրահոսը

Դեսպան Հասմիկ Տոլմաջյանը բարձր է գնահատել Շվեյցարիայի ժողովրդի անմնացորդ նվիրվածությունը հայ ժողովրդին՝ նրա պատմության դժվարին ժամանակաշրջանում

Ապրիլ 23,2025 11:03

Ապրիլի 12-ին, Ժնևի ՄԱԿ-ի գրասենյակում Հայաստանի մշտական ներկայացուցիչ և Շվեյցարիայում Հայաստանի դեսպան Հասմիկ Տոլմաջյանը մասնակցել է «Ժնևցի հումանիստ-բարերարների հայանպաստ գործունեությունը հայ ժողովրդի պատմության ողբերգական իրադարձությունների ժամանակ» խորագրով համաժողովին, որը տեղի է ունեցել Ժնևի հայկական կենտրոնում։ Միջոցառմանը մասնակցում էին շվեյցարացի և հայազգի մտավորականներ, ակադեմիական շրջանակների ներկայացուցիչներ, ինչպես նաև Հայոց ցեղասպանությունը վերապրած ընտանիքների ժառանգներ։

Համաժողովը կազմակերպվել էր Ժնևի «Գուստավ Ադոր» և «Սուրբ Գրիգոր Լուսավորիչ» հիմնադրամների համագործակցությամբ՝ նպատակ ունենալով հիշել և երախտիքի տուրք մատուցել այն արժեքներին, որոնցով առաջնորդվել են ժնևցի հումանիստ-բարերարները հայոց պատմության դժվարին օրերին հայ ժողովրդին սատարելու ջանքերում։

Համաժողովի ընթացքում անդրադարձ է կատարվել Օսմանյան կայսրությունում համիդյան ջարդերի և Հայոց ցեղասպանության օրերին շվեյցարացի ժողովրդի և հումանիստների հայանպաստ գործունեությանն և համերաշխությանը հայ ժողովրդին, ինչը հայ-շվեյցարական բարեկամության հիշարժան էջերից է։ Ներկայացվել են հայ ժողովրդի համար դժվարին այդ ժամանակահատվածում ժնևցի հումանիստ-բարերարների՝ Շվեյցարիայի Ազգային ժողովի նախագահ, Կարմիր խաչի միջազգային կոմիտեի նախագահ Գուստավ Ադորի, ինչպես նաև Լեոպոլդ Ֆավրի և Էդուարդ Նավիլի ջանքերը որբացած հայ մանուկներին օգնություն ցուցաբերելու հարցում։ Հայ նկարիչ Սարգիս Խաչատուրյանի՝ «Հայ որբերի բարեկամին» մակագրությամբ Գուստավ Ադորի՝ 1913 թվականին ստեղծված դիմանկարը միջոցառմանը ներկայացվել է որպես հավաքական հիշողության յուրօրինակ խորհրդանիշ։

Մեծ երախտագիտությամբ հիշատակվել է Անտոնի Կրաֆտ Բոնարի շնորհիվ Բենյինում ցեղասպանությունից մազապուրծ եղած հայ որբերին ապաստան տրամադրելու համար մանկատան հիմնումը՝ մանուկներին հայկական կրթությամբ ու ոգով դաստիարակելու վեհ նպատակով։

Իր խոսքում դեսպան Հասմիկ Տոլմաջյանը բարձր է գնահատել Շվեյցարիայի ժողովրդի անմնացորդ նվիրվածությունը հայ ժողովրդին նրա պատմության դժվարին ժամանակաշրջանում։ Դեսպանը երախտիքի տուրք է մատուցել շվեյցարացի հումանիստներին՝ ընդգծելով, որ նրանց գործունեության շնորհիվ տեղի ունեցած իրադարձությունները հիշվում են ոչ միայն ողբերգական և դաժան էջերով, այլև հումանիզմի դրսևորումներով, որոնք մարդկային արժեքների հանդեպ հավատի աղբյուր են հանդիսանում։ Դեսպանը նաև կարևորել է համատեղ ջանքերով հայ–շվեյցարական բարեկամության խորացմանն ուղղված քայլերն ու հավաքական հիշողության պահպանումը։

Շվեյցարիայում ՀՀ դեսպանություն և Ժնևի ՄԱԿ գրասենյակում ՀՀ մշտական ներկայացուցչություն

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Ապրիլ 2025
Երկ Երե Չոր Հնգ Ուրբ Շաբ Կիր
« Մար   Մայիս »
 123456
78910111213
14151617181920
21222324252627
282930