«Եթե ինչ-որ լուրջ գործընթաց է գնում, ինձ համար անտեսանելի է։ Գործընթացներից ես միայն վերջերս տեսա, որ ԱԺ պատգամավոր Լուսինե Բադալյանի հետ, մեր ընդդիմադիր պատգամավորները, ովքեր լրջության կոչեր են անում, ԱԺ այգում սակուրաներից ինչ-որ թիթեռներ էին կախում։ Եթե նկատի ունեք, որ մենք այդ գործընթացից ենք իրենց շեղում, ապա՝ միգուցե»,-խորհրդարանի շենքի մոտ, լրագրողների հետ զրույցում ասաց ՎԵՏO շարժման համակարգող Նարեկ Մալյանը՝ պատասխանելով մեղադրանքներին, որ իրենք անլրջացնում են Նիկոլ Փաշինյանի իմպիչմենտի գործընթացը։
Հիշեցնենք, այսօր ՎԵՏՕ շարժման ղեկավար Նարեկ Մալյանի, Լեհաստանում Հայաստանի նախկին դեսպան Էդգար Ղազարյանի եւ մի խումբ այլ ընդդիմադիրների կողմից ձեւավորված «Արթուն ենք» հանրային շարժման անդամները խորհրդարան մուտք արեցին ԱԺ պատգամավորներին ուղղված նամակներ՝ Նիկոլ Փաշինյանին` 10 օրվա ընթացքում անվստահություն հայտնելու գործընթաց նախաձեռնելու առաջարկով։ Նամակներն անհատական են։ Դրանք գցվեցին խորհրդարանի ընդունարանի մուտքում տեղադրված արկղի մեջ։
Կարդացեք նաև
Նարեկ Մալյանը հայտարարեց, որ ցանկացած մարդ, որը դեմ է արտահայտվում իմպիչմենտի գործընթացին, նպաստում է Նիկոլ Փաշինյանի իշխանության պահպանմանը։ Իսկ նման մարդիկ, ըստ նրա, առայժմ երկուսն են՝ Նիկոլ Փաշինյանը եւ Ռոբերտ Քոչարյանը։ Իմպիչմենտը, Նարեկ Մալյանի համոզմամբ, առայժմ միակ տարբերակն է Նիկոլ Փաշինյանին իշխանությունից հեռացնելու։ Ավելին, ԱԺ պատգամավորները այլ գործիքներ չունեն, միակ գործիքը սա է։
Հարցին՝ ՔՊ-ն կմիանա՞ իրենց նախաձեռնությանը, Նարեկ Մալյանն արձագանքեց, թե վստահ է՝ այո, քանի որ անցած տարի Բագրատ սրբազանի նախաձեռնած շարժման ժամանակ, նույնիսկ Հայրենիքի փրկության շարժման ժամանակ էլ, ՔՊ-ական պատգամավորներ են եղել, ովքեր իր միջոցով ազդակներ են հղել՝ ընդդիմության նախաձեռնությանը միանալու, եթե կպահպանվի իրենց պատգամավորի կարգավիճակը, աշխատավարձը, ծառայողական մեքենան։ Ըստ Նարեկ Մալյանի, Նիկոլ Փաշինյանի շրջապատում մարդիկ երկու բանի համար են հավաքված՝ վախի եւ շահի եւ եթե կլինի համազգային շարժում, մարդիկ վախից կձերբազատվեն։
Իր բնութագրմամբ, այս քայլով փորձում են Նիկոլ Փաշինյանի պաշտոնանկության հարցը կոլեկտիվ անպատասխանատվության դաշտից տեղափոխել անհատական պատասխանատվության դաշտ։
Նարեկ Մալյանը տեղեկացրեց, որ «Արթուն ենք» շարժման անդամներն այսօրվանից հանդիպումներ են նախաձեռնելու ՀՀ երեք նախագահների՝ Լեւոն Տեր-Պետրոսյանի, Ռոբերտ Քոչարյանի եւ Սերժ Սարգսյանի հետ, նաեւ՝ քաղաքական միավորների հետ՝ խորհրդակցական առաքելությամբ, որպեսզի փողոցում գործընթաց նախաձեռնելուց առաջ, հստակեցնեն մոտեցումները եւ անելիքները։
Մանրամասները՝ տեսանյութում
Նարեկ Մալյանի համոզմամբ, խորհրդարանում իմպիչմենտի գործընթացի գեներացումն՝ առանց փողոցում համազգային ցույցերի գեներացման եւ հակառակը, անիմաստ է։
Մանրամասները՝ տեսանյութում
Նելլի ԳՐԻԳՈՐՅԱՆ
