ՌԴ և լիտվացի քաղաքացիները, ովքեր ամիսներ առաջ մետրոպոլիտենում վնասել էին մետրոյի վագոնները, կազատազրկվեն երեք ամսով և 1,5 միլիոն դրամ տուգանք կվճարեն` նվազագույն աշխատավարձի քսանապատիկի չափով. այսօր դատարանը նման որոշում կայացրեց։ Պատիժը կրելուց հետո ՌԴ և Լիտվիայի քաղաքացիները կվտարվեն Հայաստանից։ Ավելին, նրանց մուտքը ՀՀ` 10 տարով արգելված կլինի։
Այսօր Ընդհանուր իրավասության դատարանի Կենտրոն նստավայրում ընթացավ մետրոյի վագոնները ներկած օտարերկրացիների գործով դատական նիստը։
Այլ մանրամասները` տեսանյութում
Կարդացեք նաև
Հիշեցնենք, որ այս տարվա փետրվարի 1-ին, ժամը 21.32-ին, Ոստիկանության օպերատիվ կառավարման կենտրոն հաղորդում է ստացվել, որ Մետրոպոլիտենի «Սասունցի Դավիթ» և «Հանրապետության հրապարակ» կայարանների միջակայքում` բաց հատվածում, դիմակավորված անձինք ներկ են փչում գնացքի վագոնների վրա։ Րոպեներ անց կրկին ահազանգ է ստացվել, որ նույն անձինք քարեր են նետում գնացքի ուղղությամբ և թույլ չեն տալիս, որ այն շարժվի:
Դեպքի վայր մեկնած օպերատիվ խումբը պարզել է, որ նախ աշխատեցրել են գնացքի «վթարային կանգառ» բռնակը, իսկ շարժակազմի կանգառից հետո կայարանների միջանկյալ հատվածից, պատը մագլցելով, վազել-մոտեցել են մի խումբ անձինք և ներկելու միջոցով վնասել ուղևորներով ընթացող գնացքի վագոնները: Պարզվել է կատարողների ինքնությունը։ Համայնքային ոստիկանության Մետրոպոլիտենի բաժնի ծառայողներն իրացնելով օպերատիվ տեղեկությունները՝ ԱԱԾ և Համայնքային ոստիկանության Նոյեմբերյանի բաժնի աշխատակիցների հետ, խուլիգանության կասկածանքով ձերբակալել են Բագրատաշենի սահմանային անցակետը հատել փորձող հինգ օտարերկրացու:
Նելլի ԳՐԻԳՈՐՅԱՆ
