Ֆինանսական զեղծարարություններից տուժած քաղաքացիներն այսօր կրկին բողոքի ցույցի են դուրս եկել՝ այս անգամ Կենտրոնական բանկի դիմաց:
«Քաղաքացիներ ունենք, որոնց անուններով զեղծարարները 12 միլիոն դրամի, 53.000 դոլարի չափով վարկեր են ձեւակերպել: Որոշ բանկերի կողմից ընդհանրապես արձագանք չունենք: Այն համաձայնությունը, որ ունեինք Կենտրոնական բանկի պաշտոնյաների հետ, որ խնդիրը պետք է լուծվի, վարկային պահանջները չեղարկվեն քաղաքացիների նկատմամբ, այդ առաջարկը եւս չպահպանվեց: ԱյԴի բանկը երկրորդ ծուղակն է պատրաստում քաղաքացիների համար: Մեր ձեռքի տակ ունենք վարկային պայմանագրի նմուշ, ըստ որի՝ քաղաքացիներին առաջարկվում է երկու տարով չեղարկել վարկային պարտավորությունները, ապա 24% -ից իջեցնել 12% ու վճարել ինչ-որ գրաֆիկով: Դրանից էլ ենք հրաժարվել, հետո առաջարկվել է եւս մի պայմանագիր, որով առաջարկում են վարկը չեղարկել հինգ տարի ժամկետով, 5 տարի անց վճարել 12%-ով: Եթե քաղաքացիները ներկա պահին չունեն վարկային պայմանագիր բանկի հետ կնքած, ինչո՞ւ պետք է այսպիսի գայթակղիչ թվացող առաջարկներով քաղաքացիներին բերեն այն հարթակ, որ ունենան վարկային պայմանագիր: Քաղաքացիները ուղղակի հրաժարվել են այդ առաջարկներից»,- լրագրողների հետ զրույցում այսօր ասաց «Հանրային վերահսկողություն» հ/կ ղեկավար Մհեր Կարագյոզյանը:
Ըստ նրա` քաղաքացիներից հանիրավի գումարների պահանջը կոչվում է թալան:
Կարդացեք նաև
Նա նաեւ ասաց, որ հանդիպում են պահանջում ԿԲ իրավասու պաշտոնյաների հետ, բայց ոչ պատերի տակ. հանդիպում միայն ու միայն լրատվամիջոցների ներկայությամբ: Կարագյոզյանի խոսքով՝ չեն գնալու նրանց աշխատասենյակներ՝ լսելու նրանց ապօրինի առաջարկները:
Արփինե ՍԻՄՈՆՅԱՆ
