Կառավարությունն այսօրվա նիստում գումար հատկացրեց Օմանի Սուլթանությունում ՀՀ դեսպանություն բացելու համար։
ԱԳ նախարար Արարատ Միրզոյանն ասաց, որ Հայաստանի եւ Օմանի միջեւ եւ տնտեսական, եւ քաղաքական հարաբերությունների խորացման հսկայական ներուժ կա։ «Մենք տեսնում ենք, թե այդ ներուժն ինչպես կարող ենք իրացնել։ Մեկ օրինակ բերեմ՝ Օմանն այժմ իր ծովային եւ այլ ենթակառուցվածքներն է զարգացնում։ Եվ մենք Օմանի ծովային, օդային ու ցամաքային տարածքը կարող ենք տրանզիտի եւ այլ առումներով ավելի լավ օգտագործել»,- ասաց նա։
Արարատ Միրզոյանն անդրադարձավ նաեւ Փարիզում, Լոնդոնում եւ Բրյուսելում ՀՀ դեսպանությունների շենքեր ձեռք բերելու հարցին։ Նա ասաց, որ Փարիզում ձեռք բերված շենքը շատ ներկայանալի է, բայց շենքի ներսում էական վերանորոգման աշխատանքներ են կատարվում։ Նախատեսվում է, որ հաջորդ տարվա սկզբին արդեն աշխատանքները կավարտվեն, եւ դեսպանության անձնակազմը կտեղափոխվի նոր շենք։ «Մենք հիմա Բելգիայում՝ Բրյուսելում կարողացանք ձեռք բերել շենքը, այնտեղ էլ վերանորոգման կարիք կլինի»,- նշեց Արարատ Միրզոյանը։
Նիկոլ Փաշինյանը զարմացավ եւ ասաց, որ տեղյակ չէր, որ արդեն գնել են, ինչո՞ւ կառավարության որոշում չկա։ Արարատ Միրզոյանը հավելեց․ «Ձեռք բերման որոշումն ունենք, պայմանագիրը կնքված է, բայց փողը դեռ չենք տվել»։
Կարդացեք նաև
Մանրամասները՝ տեսանյութում
Ռոզա ՀՈՎՀԱՆՆԻՍՅԱՆ
