ԱԺԲ գրասենյակում կազմակերպված հերթական հանդիպում-քննարկման հյուրը ՀՀ Գերագույն Խորհրդի պատգամավոր Մեխակ Գաբրիելյանն էր:
Ելույթ ունենալով «Ապագա Հայաստանի տեսլականը» թեմայով՝ նա ներկայացրեց իր պատկերացումները, ըստ որի ապագա Քրիտոնեական Հայաստան ունենալու համար անհրաժեշտ է արմատական փոփոխություններ իրականացնել բոլոր ոլորտներում՝ սկսած քրիստոնեական արժեքների ու բարոյականության վերականգնումից, վերջացրած օրենսդրությունն ու երկրի կառավարման համակարգի ամբողջական բարեփոխումներով:
«Աստված տա, մենք կարողանանք առաջիկայում ի մի գալ եւ հաջորդ ընտրություններում ազգայնական ուժերը հաղթեն ու միավորեն բոլորին: Այդ դեպքում հնարավոր է այս ամբողջը գլուխ բերել: Բայց որ Հայաստանում այլեւս շատ են ազգայնական ուժերը, որոնք մտորում, մտածում են՝ ոնց անել, ինչ անել: Եվ չեն կարողանում գալ այն եզրահանգման, թե ինչն է խանգարողը, որ չեն կարողանում: Իմ կարծիքով դա այն արժեքներն են, որոնք պետք է տեսնել: Եթե քրիստոնեական, ազգային այդ արժեքները դրվեն մեջտեղ, բոլորը կհամախմբվեն, կհավաքվեն: Եվ շատ սահուն տեղի կունենա իշխանության իրական տերերի վերադարձը»,-ասաց բանախոսը:
Հարցին, թե նա կարծում է, որ հերթական կամ արտահերթ ընտրություններով, հնարավո՞ր է այս իշխանություններին հեռացնել, պարոն Գաբրիելյանը պատասխանեց. «Լավագույն տարբերակը այն կլիներ, որ սրանք ժամանակից շուտ ճանապարհվեն: Բայց մի քիչ կասկածում եմ, որ դա տեղի ունենա, որովհետեւ փաստորեն այն ուժերը, այն համախումբը, որ ստեղծված է փոխադարձ օգնության, նկատի ունեմ՝ Ադրբեջան-Թուրքիա-Ռուսաստան-Հայաստանի իշխանություն, իրենք փոխլրացնելով, իրար օգնելով եւ պահելով՝ մեկմեկու տանում են առաջ»:
Կարդացեք նաև
Aravot.am-ը ցանկացավ տեղեկանալ, թե բանախոսը ինչ է մտածում ներկայումս շրջանառության մեջ դրված վարչապետին անվստահություն հայտնելու գործընթացի մեկնարկի մասին: «Լավ կլիներ, բայց կասկածում եմ, որ դա տեղի ունենա, որովհետեւ խորհրդարանի ընդդիմությունը միասնական է իշխանության հետ եւ մի տեղից է կառավարվում: Ժողովրդին զբաղեցնելու համար ինչ-որ բաներ են փորձում գտնել: Կան մարդիկ, որ ազնիվ նկատառումներով են այդ քայլին գնում: Բայց մենք խորհրդարանում ունենք այսպիսի ընդդիմություն, որն իրականում ընդդիմություն չէ, այլ այդ անվան տակ միասնական նույն ճակատն է»:
Աշոտ ՀԱԿՈԲՅԱՆ
