Aravot.am-ը ԵՊՀ մամուլի խոսնակ Քնար Միսակյանից հետաքրքրվեց, թե որն է հիմնավորումը, որ ԵՊՀ գիտխորհրդի դահլիճում, որը նախատեսված է ակադեմիական, գիտակրթական նպատակների համար՝ անցկացվել է «Տավուշ» հայրենակցական միության համագումարը, որի ընթացքում նախագահ է ընտրվել «Քաղաքացիական պայմանագիր» կուսակցության վարչության անդամ, Հայաստանի պետական վերահսկողության ծառայության ղեկավար Ռոմանոս Պետրոսյանը, որը ծնունդով Չինարի գյուղից է:
Կատարվածը հարուցել էր ակադեմիական շրջանակների դժգոհությունը:
Ժամեր շարունակ լռելուց եւ զանգերին տեւական ժամանակ չպատասխանելուց հետո մայր բուհի լրատվականից պատասխանեցին, որ այդ հարցի վերաբերյալ մեկնաբանություն չունեն:
Կարդացեք նաև
Ի դեպ, անցյալ տարվա դեկտեմբերին էլ Նիկոլ Փաշինյանի կինը՝ Աննա Հակոբյանն էր ֆեյսբուքի իր էջում տեղեկացրել է, որ ԵՊՀ ղեկավար կազմի, աշխարհագրության եւ երկրաբանության ֆակուլտետի ղեկավար կազմի, դասախոսների եւ ուսանողների հետ քննարկել է «Կրթվելը նորաձեւ է» գաղափարը, իր ձեւակերպմամբ՝ «կրթվելը հանրային առավել լայն միջավայրում նորաձեւ, ապա նորմա դարձնելու ճանապարհները»։
Նիկոլ Փաշինյանի աշխատակազմի ղեկավար, ՔՊ-ական Արայիկ Հարությունյանն իր նախարարության տարիներին հայտարարում էր, թե հովանավորչությունը զրո տեղ է ունենալու իրենց գործունեության մեջ, քանի որ պայքարում են բուհերի, տարբեր հաստատությունների խորհուրդների ՀՀԿ-ացման դեմ, սակայն իրենց իշխանության օրոք նույն խորհուրդները անխնա ՔՊ-ացվեցին, ՀՀԿ-ականները փոխարինվեցին «Քաղաքացիական պայմանագիր» կուսակցության եւ գործող իշխանության ներկայացուցիչներով, իսկ ԵՊՀ-ն մղվեց քաղաքական, կուսակցական, հիմա էլ համայնքային դաշտ: ՀՀ պաշտպանության նախարար Սուրեն Պապիկյանը ԵՊՀ հոգաբարձուների խորհրդի նախագահն է, իսկ Փաշինյանի կառավարության նախարարները, փոխնախարարները, գլխավոր դատախազը եւ այլք՝ խորհրդի անդամները, ինչը 2018-ին իշխանության եկած ՔՊ-ականների խոստումների հակառակն է փաստում:
Հավելենք, որ ԵՊՀ ռեկտոր Հովհաննես Հովհաննիսյանին էլ ստիպված ֆեյսբուքով հաղորդագրություն ուղարկեցինք՝ մեկնաբանության համար, քանի որ նրա հետ այլ կերպ կապվելն անհնար է, նա, սակայն, չի պատասխանել մեր հաղորդագրությանը:
Գոհար ՀԱԿՈԲՅԱՆ
