«Բավականին լավ բանաձեւ էր, մենք չէինք կարող որեւէ կերպ դեմ լինել նման բանաձեւին»,- այսօր խորհրդարանում հայտարարեց իշխող «Քաղաքացիական պայմանագիր» խմբակցության պատգամավոր Սարգիս Խանդանյանը՝ խոսելով ԵԺԿ-ի՝ Հայաստանի վերաբերյալ վերջերս ընդունած բանաձեւի մասին, որի վերաբերյալ ՀՀԿ-ն խորը վրդովմունք եւ ափսոսանք էր հայտնել։
ԵԺԿ համագումարին իշխող կուսակցությունից մասնակցել էին Սարգիս Խանդանյանը եւ Մարիա Կարապետյանը, ՀՀԿ-ից՝ Հայկ Մամիջանյանը եւ «Ժառանգությունից» Րաֆֆի Հովհաննիսյանը։
Սարգիս Խանդանյանը հայտարարեց, որ իր գնահատմամբ, այդ բանաձեւը դրական լույսի ներքո է ներկայացնում ՀՀ-ն, մասնավորաբար իշխանության «Խաղաղության խաչմերուկ» ծրագիրը։ Բայց արդեն Վալենսիայում, ԵԺԿ համագումարին մասնակից եվրոպացի պատգամավորները ՔՊ-ի ներկայացուցիչներին ասել են, որ ընդդիմադիր հայ գործընկերներն ուզում են, որ բանաձեւը դուրս բերվի համաժողովի օրակարգից։
«Մենք տարակուսած էինք, որ նույնիսկ այդպիսի հարթակներում Հայաստանի ընդդիմությունը կարող է նման կերպ հանդես գալ»,- ասաց նա՝ հայտարարելով, որ քննարկումը փակ է եղել ու չի կարող մեջբերել Րաֆֆի Հովհաննիսյանի եւ Հայկ Մամիջանյանի ասածները, բայց իր բնութագրմամբ՝ «նրանք ուղղակիորեն պայքարում էին ՀՀ-ի շահերի դեմ»։
Կարդացեք նաև
ՔՊ-ական պատգամավորը վրդովված է, որ ընդդիմադիրները քննադատում են ԵԺԿ-ի այդ բանաձեւը։ Կարծում է, որ խնդրահարույցն այն է, որ բանաձեւում ամրագրվում է՝ ՀՀ-ն ինքնիշխան երկիր է դառնում՝ առանց ՌԴ-ի կախվածության։ Նա մեղադրեց ընդդիմադիրներին «Եդինայա Ռոսիայի» կազմակերպած միջոցառմանը մասնակցելու համար եւ սա որակեց ոչ թե ամոթի, այլ ազգային անվտանգության հարց։
Մանրամասները՝ տեսանյութում
Նելլի ԳՐԻԳՈՐՅԱՆ
