«Ո՞ւմ գողանան, ինչի՞ համար գողանան, գողանան որ ի՞նչ անեն»,- խորհրդարանում, ի պատասխան լրագրողների հարցերի՝ ասաց ԱԺ նախագահ Ալեն Սիմոնյանը։
Լրագրողները հետաքրքրվում էին այս պահին Գյումրիում տեղի ունեցող իրադարձություններով․ փաստաբան Սոս Հակոբյանը հայտարարել է, որ Գյումրու ավագանու «Մեր քաղաքը» խմբակցության անդամ Կարեն Բադալյանի կամքի վրա իշխանական շրջանակներից փորձել են ազդել։
«Իշխանափոխություն անելու համար պետք է այդ մեկ հոգո՞ւն գողանալ, որ դա լինի, լո՞ւրջ»,- տարակուսեց Ալեն Սիմոնյանը՝ հավելելով, որ Գյումրիում ոչ մեկը ոչ մեկին չի գողանում, ՔՊ-ն էլ այդ մարդու հետ որեւէ կապ չունի։
Կարդացեք նաև
«Ասեմ ավելին, ցանկություն էլ չունի որեւիցե կապ ունենալու: Գյումրեցին կատարել է իր ընտրությունը, մենք գյումրեցուն թողնում ենք իր ընտրության հետ: Տեր ենք կանգնում մեր ձայներին, վերջիվերջո, մենք առաջին տեղն ենք զբաղեցրել»,- ասաց նա։
Ալեն Սիմոնյանն անդրադարձավ նաեւ «Պատիվ ունեմ» խմբակցության դիրքորոշմանը՝ միանալ Նիկոլ Փաշինյանին անվստահություն հայտնելու գործընթացին։
«Քաշվանք, բա հիմա ի՞նչ ենք անելու, աննախադեպ մի բան, չորս տարի անց… չէի սպասում, անկեղծ»,- հեգնեց նա։
Մանրամասները՝ տեսանյութում
Նելլի ԳՐԻԳՈՐՅԱՆ
