Խորհրդարանում ԲԴԽ անդամի ՔՊ-ի թեկնածու Անահիտ Աբրահամյանի ելույթից հետո «Պատիվ ունեմ» խմբակցության պատգամավոր Թագուհի Թովմասյանը հարցեր տվեց ԲԴԽ անդամի թեկնածուին և նշեց, որ ակնկալում է հստակ դիրքորոշում․ «Այստեղ շատ են գալիս տարբեր թեկնածուներ, խոստանում անկախ դատական համակարգ, վերջում ունենում ենք այն, ինչ ունենք։ ՀՀ-ում դատական համակարգը ոչ միայն հեռու է կատարելությունից, այլև հեռու է անկախություն բառից։ Կարեն Անդրեասյանը, որ քաղաքականապես և մարդկայնորեն ոգեշնչված էր Նիկոլ Փաշինյանի լուսանկարով՝ իր թիկունքում փակցված, մի շարք դատավորների նկատմամբ պարզապես կարգապահական վարույթներ հարուցելով՝ պատժեց նրանց՝ ենթադրյալ քաղաքական նպատակներով։ Այդ դատավորների մեծ մասին, ում Կարեն Անդրեասյան-Գագիկ Ջհանգիրյան զույգը հերթով հեռացրեց դատավորի պաշտոնից, ՄԻԵԴ-ը նրանց մասով կոմունիկացրել է արդեն, ինչը նշանակում է, որ լինելու են ընդդեմ ՀՀ-ի հերթական որոշումները։ Ուզում եմ հասկանալ՝ եթե իրավական խախտում արձանագրվի, ո՞րն է Ձեր դիրքորոշումը, այդ դատավորները պե՞տք է հետ գան և շարունակեն աշխատել։ ԲԴԽ անդամները, որոնք զրկել են այդ դատավորներին իրենց կարգավիճակից պիտի՞ պատասխանատվության ենթարկվեն մյուս դատավորներին հեռացնելու և հետևաբար ընդդեմ ՀՀ -ի հերթական վճիռը գեներացնելու համար»։
Թագուհի Թովմասյան
Անահիտ Աբրահամյանն ի պատասխան ասաց․ «Որպես ԲԴԽ անդամի թեկնածու՝ այս պահին սահմանափակված եմ որոշակի կարծիք հայտնելու պարզ պատճառով, որովհետև ընտրվելու պարագայում, եթե այս պահին որևէ կարծիք հայտնեցի, հետո ստիպված կլինեմ չմասնակցել այդ գործերի քննությանը կողմնակալ լինելու պատճառով։ Ինչ վերաբերում է դատավորների վերանշանակմանը և այլն, ՀՀ դատական օրենսգիրք սահմանադրական օրենքը սահմանում է գործերի վերանայման համապատասխան հիմք, և կարծում եմ, որ եթե համապատասխան դիմում կլինի նշված դատավորների կողմից, այդ գործը ԲԴԽ նիստում կքննվի։ Այս հարցի առնչությամբ ևս պիտի չեզոք դիրքորոշում ունենամ»։
Կարդացեք նաև
Տաթև ՀԱՐՈՒԹՅՈՒՆՅԱՆ
