«2025 թվականի բուհերի ընդունելության միասնական քննությունների 2-րդ փուլի հայտագրման ժամանակահատվածում բոլոր դիմորդները պարտավոր են նշել բուհը, մասնագիտությունը, իսկ եթե ցանկանում են հանձնել նաեւ ներբուհական քննություններ, բնականաբար, պետք է նշեն նաեւ այդ քննությունները։ Հայտագրմանն գործընթացն ավարտվում է մայիսի 10-ին, եւ օրեցօր նկատում ենք, որ դիմորդների թիվն ավելանում է»,- «Արմենպրեսի» մամուլի սրահում կայացած ասուլիսում նշեց Գնահատման եւ թեստավորման կենտրոնի տնօրենի տեղակալ Կարո Նասիբյանը։
«Եթե 2025թ․ հունվարին ունեցել ենք 11608 դիմորդ, ապա այսօր արդեն ունենք 12820 դիմորդ, եւ սա փոփոխական է ամեն րոպե, միայն 7780 միասնական քննություններ հանձնող ունենք։ Երկրորդ տարին է, զգուշացնում ենք մեր դիմորդներին, որոնք չեն կատարում մի պարզ, հասարակ գործողություն․ երբ առաջին փուլում՝ հունվար-փետրվար ամիսներին իրենք քննություն են հանձնում, ապա երկրորդ փուլում պարտավոր են նշել բուհը եւ մասնագիտությունը, սակայն ոմանք մոռանում են նշել բուհն ու մասնագիտությունը, նույնիսկ հաճախ չեն էլ հայտագրվում։
Նախորդ տարիներին ունեցել ենք դեպքեր, երբ դիմորդը, որը ցանկանում էր ուսումը շարունակել բուհի առկա ուսուցման համակարգում, պարզապես դուրս մնաց մրցույթից, որովհետեւ երկրորդ փուլում չէր նշել բուհը, մասնագիտությունը։ Իսկ ԳԹԿ-ում, բնականաբար, համակարգիչը չի կարողանում ընկալել՝ ինչի համար է դիմորդը հանձնել միասնական քննությունները, ինչ կա դիմորդի մտքին։ Ունենք տարբեր տեղեր, որտեղ նա կարող է օգտագործել միասնական քննությունների միավորները, թեկուզ հեռակա ուսուցման համակարգում։
Մենք ունենք 4240 դիմորդ, որոնք ունեն գնահատականներ, բայց չեն նշել բուհն ու մասնագիտությունը, ուստի հորդորում եմ, պահանջում եմ, խնդրում եմ, որ այս 4 օրվա ընթացքում անպայման ընտրեն բուհն ու մասնագիտությունը, այլապես նախորդ տարվա նման կլինեն դիմորդներ, որոնք դուրս կմնան մրցույթից։ Մենք նույնիսկ հաղորդագրություններ ենք ուղարկում իրենց հեռախոսահամարներին, որ դուք ձեր բուհը չեք նշել, եւ եթե ցանկանում եք ուսումը շարունակել առկա ուսուցման համակարգում, ապա ընտրեք բուհն ու մասնագիտությունը»,-մանրամասնեց Կարո Նասիբյանը։
Կարդացեք նաև
Մանրամասն՝ տեսանյութում
Գոհար ՀԱԿՈԲՅԱՆ
