Vatican News. Ակոսթինեան միաբանութենէն եւ Միացեալ Նահանգներէն առաջին Քահանայապետը, 69 ամեայ Ռոպերթ Ֆրանսիս Փրեվոսթը դարձաւ Տիեզերական Եկեղեցւոյ 267րդ Քահանայապետը առնելով Լեւոն ԺԴ անունը։
Լեւոն 14-րդ երկրորդ Քահանայապետն է` որ ընտրուեցաւ Ամերիկեան ցամաքամասէն, Ֆրանչիսկոս Պապէն ետքը եւ առաջինն է, որ ծնունդով Միացեալ Նահանգներէն է:
Ծնած է 14 սեպտեմբեր, 1955ին, Միացեալ Նահանգներու Չիքակոյի Իլլինոյ քաղաք՝ ծագումով Ֆրանսացի եւ Իտալացի Լուիս Մարիուս Փրեվոսթ հօր եւ Սպանացի Միլտրէտ Մարթինէս մօր կողմէ: Ունի երկու եղբայրներ` Լուիս Մարթին եւ Ժոն Ժոզէֆ:
1977-ին մտած է Փենսիլվանիայի Օգոստինեան միաբանութեան նորընծայարան եւ 29 օգոստոս 1981-ին կատարած է իր ուխտերը։
Չիքակոյի կաթողիկէ համալսարանի մէջ աւարտած է աստուածաբանական համալսարանական ուսումները: 27 տարեկանին, ուղարկուած է Հռոմի Տոմինիքեաններու Սուրբ Թովմաս Աքուինացի քահանայապետական համալսարան, ուր ուսանած է եկեղեցական իրաւագիտութիւն:
1982-ի 19 յունիսին ձեռնադրուած է Քահանայ։ 1984ին ստացած է կանոնագիտութեան վկայական, ապա ուղարկուած է Փերու, ուր ծառայած է Չուլուքանասի միսիոներական առաքելութեան մէջ (1985 – 1986)։
1987ին, ստացած է կանոնագիտութեան դոկտորական աստիճան, ապա նշանակուած է Իլինոյ նահանգի Օլիմպիա Ֆիլդս քաղաքին մէջ գտնուող «Բարի Խորհուրդի Մայր» Օքոստինեան միաբանութեան նահանգի կոչումներու ու առաքելութիւններու տնօրէն։
11 տարիներու ընթացքին Ան եղած է Օգոստինեան միաբանութեան մեծաւոր
(1988-1992), կազմաւորման տնօրէն (1988-1998) ու դաստիարակ (1992-1998) հուսկ Թրուժիլլոյի արքեպիսկոպոսարանին մէջ անուանուած է դատարանի փոխ դատաւոր(1989-1998)։
Ան ապա միաժամանակ վարած է Չիքակոյի «Բարի խորհուրդի Մայր» Եկեղեցւոյ հովիւի պաշտօնը, Եկեղեցի` որ ապա դարձաւ ժողովրդապետութիւն առնելով Սրբուհի Ռիթայի անունը (1988-1999) ու կը գտնուի քաղաքի աղքատ շրջանի մէջ։
1999 թուականին ընտրուեցաւ Չիքակոյի «Բարի Խորհրդի Մայր» Օգոստինեան նահանգի աւագ տեսուչ, եւ երկու ու կէս տարի ետք միաբանութեան սովորական ընդհանուր ժողովի ընթացքին անոր եղբայրակիցները զայն կ՛ընտրեն Միաբանութեան Աւագ Մեծաւոր, 2007 թուականին զայն վերահաստատելով նոյն պաշտօնի վրայ։
2014թ. նոյեմբեր 3-ին Ֆրանչիսկոս Պապի կողմէ կը նշանակուի Փերուի Չիքլայոի թեմի Առաքելական Կառավարիչ անոր շնորհելով նաեւ Եպիսկոպոսական աստիճանը` որպէս Սուֆարի թեմի Տիտղոսաւոր Եպիսկոպոս:
7 նոյեմբեր 2014-ին, ի ներկայութեան Պապական Նուիրակ ժէյմս Փաթրիք Կրինի, կը ստանձնէ Թեմին պատասխանատուութիւնը, Եպիսկոպոս ձեռնադրուելով 12 դեկտեմբերին, Կուատալուփէ Տիրամօր տօնին օրը, թեմի տաճարին մէջ:
Անոր եպիսկոպոսական կարգախօսն է «In Illo uno unum – Միակ Քրիստոսի մէջ մենք մէկ ենք», բառեր, որոնք առնուած են Սուրբ Օգոստինոսէն, բացատրելու համար, որ «թէեւ մենք՝ քրիստոնեաներս, շատ ենք, մէկ Քրիստոսի մէջ մենք մէկ ենք»։
26 սեպտեմբեր 2015-ի մարտ ամսոյն մէջ, Գերապ. Փրեվոսթ Ֆրանչիսկոս Պապի կողմէ կը նշանակուի Չոքլայոյի եպիսկոպոս եւ 2018 կ՛ընտրուի Փերուի Եպիսկոպոսաց համահաւաք դասի փոխ նախագահ:
2019 թուականին Ֆրանչիսկոս Պապին հրամանով կը նշանակուի Կղերի վերատեսչութեան անդամ ապա 2020-ին Եպիսկոպոսներու Վերատեսչութեան անդամ ու նաեւ Փերուի Քալլաօ թեմի առաքելական կառավարիչ:
30 յունուար 2023ին, Ֆրանչիսկոս Պապը զայն կը կոչէ Հռոմ` անոր յանձնելով Եպիսկոպոսներու Վերատեսչութեան Վերատեսչութիւնը եւ Լատին Ամերիկայի քահանայապետական յանձնաժողովի նախագահութիւնը: Ապա նոյն տարուայ 30 սեպտեմբերին անոր կը շնորհէ կարդինալական աստիճանը իսկ այս տարուայ 6 Փետրուարին զայն բարձրացուց Կարդինալական Դասի Եպիսկոպոսական կարգի` անոր տալով Ալպանօ Եկեղեցւոյ տիտղոսը։
