ԱԺ-ն ս.թ. մայիսի 7-ին 2-րդ ընթերցմամբ և ամբողջովին ընդունեց Կառավարության կողմից ներկայացված «Կրթության մասին» ՀՀ օրենքում փոփոխություններ և լրացումներ կատարելու մասին որոշման նախագիծը:
Արդյունքում ընդլայնվում է նախադպրոցական ուսումնական հաստատությունների, հանրակրթական դպրոցների և մասնագիտական ուսումնական հաստատությունների ղեկավարման հավաստագրերի համար դիմող անձանց շրջանակը: Համաձայն ընդունված օրենսդրական նորմի, այսուհետ մանկապարտեզի, դպրոցի և քոլեջի տնօրեն կարող են դառնալ վերջին 10 (տաս) տարվա ընթացքում ցանկացած ոլորտի կառավարման 5 (հինգ) տարվա ստաժ ունեցող յուրաքանչյուր անձ:
Օրենսդրական առումով «Կրթության մասին» ՀՀ օրենքի հիշյալ փոփոխությունը ուղիղ հակասության մեջ է մտնում «Հանրակրթության մասին» ՀՀ օրենքի, «Մասնագիտական կրթության և ուսուցման մասին» ՀՀ օրենքի, «Նախադպրոցական կրթության մասին» ՀՀ օրենքի և մի շարք այլ ենթաօրենսդրական ակտերի հետ:
Այս նոր փոփոխությունը լրիվ խնդրահարույց է բոլոր ասպեկտներով։ Այսինքն՝ այսուհետ դպրոցի տնօրեն կարող են դառնալ այնպիսի անձինք, ովքեր իրենց կրթական բովանդակությամբ, աշխատանքային փորձով, գիտելիքներով ու հմտություններով որևէ աղերս չունեն հանրակրթության ոլորտի հետ։
Կարդացեք նաև
Հարկ է նաև նշել, որ ըստ ոլորտային օրենսդրական նորմերի՝ դպրոցի տնօրենը համարվում է կրթության որակի գլխավոր պատասխանատուն, իսկ ոչ ոլորտային մասնագիտացում ունեցող կադրերի նշանակումը ուսումնական հաստատությունների ղեկավարման պաշտոններում որևէ դրական էֆեկտ չի կարող ունենալ կրթության որակի բարելավման տեսակետից։ Սա ԿԳՄՍ նախարարության կողմից ընդունված հերթական օրենսդրական փոփոխությունն է, որը էլ ավելի է խորացնելու կրթության ոլորտում արդեն իսկ առկա ճգնաժամը։
ԱՄՓՈՓՈՒՄ
Օրինակ՝ անասնաֆերմայում, սպանդանոցում, սուպերմարկետում և ցանկացած այլ հաստատությունում 5 (հինգ) տարի տնօրեն աշխատած և բարձրագույն կրթություն ունեցող ցանկացած ոք կարող է դպրոցում, քոլեջում կամ մանկապարտեզում տնօրեն աշխատել:
Վանո Կարապետյան
Պատմաբան, կրթության հարցերով անկախ փորձագետ
