Ուրբաթ օրն եմ վերջին անգամ իրենց հետ հանդիպել, խնդրել են հարցը հնչեցնել, ես իրենց կուղղորդեմ, որ գան ձեզ մոտ․ խորհրդարանում՝ Քննչական կոմիտե ղեկավար Արթուր Պողոսյանին ասաց «Պատիվ ունեմ» խմբակցության պատգամավոր Թագուհի Թովմասյանը։
Թագուհի Թովմասյանը հետաքրքրվել էր անհայտ կորած զինծառայողների ճակատագրով։ Արթուր Պողոսյանը զարմացավ ընդդիմադիր պատգամավորի այն դիտարկումից, որ անհայտ կորածների ծնողները, հարազատները անընդհատ դժգոհություն են հայտնում ՔԿ աշխատանքից։ Ասաց՝ շաբաթը մի քանի օր բոլորին ընդունում է, տեղեկություններ են տալիս, ժամերով միասին քննարկում են։ ՔԿ ղեկավարն անկեղծացավ՝ ասելով, որ նույնիսկ ծնողի բանավոր միջնորդություններին են ընթացք տալիս․ դեպք կա, որ քննչական գործողությանը ծնողը ներկա է գտնվել եւ նրա հայտնած տեղեկության հիման վրա անմիջապես է գործողությունը սկսվել։
Հետո հավելեց՝ այս ձեւաչափով չի ցանկանա այլ մանրամասների անդրադառնալ։
ՔԿ նախագահը ներկայացնում էր 2024 թվականի հաշվետվությունը։
Կարդացեք նաև
Թագուհի Թովմասյանը նաեւ Սամվել Վարդանյանին խոշտանգման դեպքով էր հետաքրքրվել՝ հարցնելով՝ Սամվել Վարդանյանին խոշտանգողներից ի՞նչ կա։
ՔԿ ղեկավարն ասաց՝ ձեւաչափը թույլ լի տալիս կոնկրետ գործի անդրադառնալ, բայց որպեսզի տպավորություն չլինի, թե հարցից խուսափում է՝ հավելեց, որ վարույթը նախաքննության փուլում է, հարցաքննվել են մատնանշված անձինք եւ փաստական տվյալներն այս պահին դեռ բավարար չեն ոստիկանության կոնկրետ աշխատակիցների վերաբերյալ վարույթ հարուցելու համար։
Մանրամասները՝ տեսանյութում
Նելլի ԳՐԻԳՈՐՅԱՆ
