Սյունիքի մարզի Քաջարան քաղաքում կայացավ «Կրթվելը նորաձև է» շարժման հերթական հանդիպումը, որն այս անգամ ևս անցավ դասական ձևաչափով՝ բանախոսություններով, երաժշտական դադարով, սուրճի ընդմիջումով և ազատ հարցուպատասխանով:
Հանդիպումն իր բանախոսությամբ բացեց Շարժման ղեկավար Աննա Հակոբյանը՝անդրադառնալով Շարժման գաղափարական հիմքերին և որոշ խմբերի կողմից դրա հանդեպ դեռևս առկա կասկածամտությանը: «Բայց այն իրականում ինքներս մեզ կրթելու, զարգանալու, միմյանց հետ անկեղծ շփվելու ու նախապաշարմունքներից զերծ երկխոսել սովորելու մասին է», – ընդգծեց նա:
Կարդացեք նաև
Հաջորդիվ ելույթ ունեցավ ՀՀ վարչապետ Նիկոլ Փաշինյանը «Իմանալ՝ ինչպես» և «Իրական Հայաստան» բանախոսություններով: Առաջինում նա ներկայացրեց կրթվելու վերաբերյալ իր տեսակետները` կրթարշավի նպատակներին ու սահմանումներին հավելելով իր ձևակերպումները. «Քո չիմացածի «հետևից գնալը» նորաձև է, քո չիմացածի մասին մտածելը նորաձև է, քո իմացածի բացերը լրացնելը նորաձև է»: Վարչապետն իր 2-րդ բանախոսության ընթացքում խոսեց պետության ընկալման վերաիմաստավորման և ազգային ինքնության հարցերի մասին:
Երաժշտական ընդմիջման հատվածում բեմ բարձրացան «Քամանչա» ժողովրդական նվագարանների համույթը, Քաջարանի մշակույթի պալատի մենապարուհի Սառա Ստեփանյանը և ֆլեյտահար Լիլիթ Գրիգորյանը:
Հանդիպումն ամփոփվեց հարցուպատասխանով: Մասնակիցներից մեկը բարձրաձայնեց արդարության ընկալման և դրա համակարգային բացերի հարցը, մյուսը` ազգային ինքնության գաղափարախոսության լայն տարածման հարցը: Խոսվեց խոսքի ազատության և դրա սահմանների չարաշահման մասին: Ընդհանուր առմամբ հարցուպատասխանի հատվածը անցավ շատ բուռն և անկաշկանդ:
Այս Շարժումը բոլորիս համար նոր մեկնարկ է՝ սովորելու, ինքնակրթվելու, մտածելու, բացահայտելու մեր ներաշխարհն ու շրջապատող աշխարհը:
Դուք նույնպես կարող եք միանալ այս համընդհանուր առաջընթացին՝ գրանցվելով հետևյալ հղումով:
«Իմ քայլը» հիմնադրամ
