Երեւան քաղաքի ընդհանուր իրավասության դատարանի Կենտրոն նստավայրում այսօր շարունակվում են հասարակական գործիչ Էդգար Ղազարյանի վերաբերյալ «ՍԴ դատավորների գործով» հիմնական դատալսումները։
Հիշեցնենք, որ Էդգար Ղազարյանին մեղադրանք էր առաջադրվել ՔՕ 490-րդ հոդվածի երկրորդ մասով՝ դատավորներին արատավորելն իրենց գործունեության համար։ Դատարանը սահմանափակել էր հասարակական-քաղաքական գործիչ Էդգար Ղազարյանի խոսքը՝ կիրառելով վարչական վերահսկողություն:
Կարդացեք նաև
Էդգար Ղազարյանն ասաց, որ իր տեղեկություններով՝ ՍԴ նախկին դատավոր, ՄԻԵԴ-ում դատավոր Վահե Գրիգորյանը զինվորական ծառայություն է անցել Արցախում։ «Լինելով իրավաբան, ծառայելով Արցախում, վիճահարույց չհամարելով իր ծառայության գտնվելու վայրը, տասնյակ տարիներ անց՝ 2024 թվականին, լինելով գործով զեկուցող դատավոր, ինչպե՞ս է Վահե Գրիգորյանն իր որոշման մեջ եւ իր հատուկ կարծիքով տալիս մեկնաբանություններ, ըստ որի՝ իր ծառայության վայրը դեռեւս 1991 թվականից հանդիսացել է Ադրբեջան։ Այդ դեպքում հարց է առաջանում՝ եթե Արցախը 1991 թվականից Ադրբեջան է եղել, Վահե Գրիգորյանը 1997-1998 թվականներին զինվորական ծառայության մեջ էր գտնվում Ադրբեջանո՞ւմ։ Դա մեղադրանք է, որը հիմա ներկայացված է Արցախի ռազմաքաղաքական ղեկավարությանը։ Այդ դեպքում ես ուզում եմ իմանալ՝ ինչո՞ւ Վահե Գրիգորյանը հիմա չի գտնվում Բաքվի դատարանում, որտեղ գտնվում են Արցախի ռազմաքաղաքական ղեկավարությունը եւ այլ գերիներ»,- նշեց Էդգար Ղազարյանը։
Նա նաեւ հարցադրում արեց․ «Իսկ եթե հիմա են փոխվել Վահե Գրիգորյանի մոտեցումները, ես ուզում եմ հասկանալ՝ ի՞նչ հանգամանքներով է դա եղել։ Այսինքն՝ միգուցե նա արդեն դավաճանություն է իրականացրել մեր պետության հանդեպ, այդ դեպքում ինչո՞ւ չի գտնվում ՀՀ քրեական դատարանում, այլ գտնվում է Մարդու իրավունքների եվրոպական դատարանում»։
Ռոզա ՀՈՎՀԱՆՆԻՍՅԱՆ
