«Անպատկառություն, խուլիգանություն…այն բոլոր հատկանիշներով, որ եկել են իշխանությունը զավթել են, այդ ամենն էլ շարունակում են»,- ՀՀԿ փոխնախագահ Արմեն Աշոտյանի գործով դատական նիստից առաջ այսօր լրագրողների հետ զրույցում ասաց ԱԺ «Պատիվ ունեմ» խմբակցության պատգամավոր Աննա Մկրտչյանը՝ անդրադառնալով Ազգային ժողովում ՔՊ-ականների պահվածքին, ընդդիմադիր պատգամավորների ծեծին:
Նրա խոսքով, ԱԺ-ում տեղի ունեցողը նորություն չէ, դեռ 2021-ին՝ ընտրություններից հետո, այսպիսի ոտնձգությունները ընդդիմադիր պատգամավորների նկատմամբ կային: Ըստ նրա՝ ակնհայտ է, որ այս իրավիճակը տեւելու է դեռ երկար, ընդդիմադիր պատգամավորները պետք է պատրաստ լինեն դրան:
Պատգամավորի խոսքով՝ ՀՀ-ն չունի օրինական ձեւավորված օրենսդիր մարմին, որը հնարավորություն կտա մտքերի փոխանակման կամ բանավեճի արդյունքում լավագույն լուծումների գալուն. «Այնտեղ միայն խոսքը գնում է դավաճանների դեմ պայքարելու մասին, իսկ դավաճանները բռնություն գործադրելուց չեն խուսափում»:
Հարցին՝ իրավիճակը երբ կփոխվի Աշոտյանի համար, տիկին Մկրտչյանը նկատեց. «Երկու շաբաթ է՝ Ազգային ժողովում իբր քննարկվում են տարբեր իրավապահ մարմինների հաղորդումները՝ հակակոռուպցիոն կոմիտե, քննչական կոմիտե, դատախազություն: Չկա գեթ մեկ ՔՊ-ական պատգամավոր, որ չի մոտենում քննչական կոմիտեի նախագահին, ինչ որ խնդրանք են անում, միջամտություն են իրականացնում: Նույն բանը դատախազության հետ, նույնը՝ Հակակոռուպցիոն կոմիտեի հետ: Էլ ի՞նչ օրինական, իրավական գործընթացների բազմակողմանիության կամ օբյեկտիվության մասին է խոսքը: ՔՊ-ական ուսապարկը մոտենում, բան է ասում, դատախազը ինչ-որ բան է գրում, քննչականի պետը ինչ-որ բան է գրում»:
Կարդացեք նաև
Արփինե ՍԻՄՈՆՅԱՆ
