«Մինչև այս պահը տվյալ տեղանքում արված վերջին լուսանկարը եղել է ապրիլի 26-ին»,- լրագրողների հետ ճեպազրույցում տեղեկացրեց ՀՀ բարձր տեխնոլոգիական արդյունաբերության նախարար Մխիթար Հայրապետյանը՝ անդրադառնալով մայիսի 4-ից անհետ կորած համարվող 2-ամյա երեխայի որոնողական աշխատանքներին։
Նշենք, որ ՀՀ Կոտայքի մարզի Մարմարիկ համայնքում կորած 2-ամյա երեխայի անհետացման փաստի առթիվ նախաձեռնվել է քրեական վարույթ։
Մխիթար Հայրապետյանն ասաց, որ դիմել են իրենց հետ համագործակցող 2 տասնյակից ավելի կազմակերպությունների․ «Դեռեւս նախորդ շաբաթ, երբ հանրային, հրապարակային տիրույթում նմանատիպ խոսակցություններ սկսվեցին, մինչև ծնողների՝ մեզ դիմելը, ես ինքս հարցը քննարկեցի համապատասխան մասնագետների հետ՝ նախ հասկանալու՝ արդյոք հնարավո՞ր է առկա և մեզ հասանելի որևէ տեխնիկական լուծումներով՝ մասնավորապես տիեզերական լուսանկարների միջոցով հասկանալ, թե իրականում ինչ է տեղի ունեցել տվյալ օրը, և այդ նյութերը ստանալու պարագայում դրանք փոխանցել ՆԳ գործընկերներին։ Փորձեցի հասկանալ՝ բարձր որակի լուծաչափ ունեցող տիեզերական լուսանկարներ ունենալու պարագայում հնարավոր լինի նույնականացնել մանկահասակ երեխային։
Կային կարծիքներ, որ տեխնիկապես այդ լուսանկարներով հնարավոր չէ նույնականացնել երեխային։ Համարեցինք, որ եթե անգամ պարզվի՝ այդ օրը առկա են որոշ ընկերությունների կողմից տվյալ տեղանքի լուսանկարներ, պետք է փորձենք՝ անկախ նրանից տեխնիկապես հնարավոր կլինի նույնականացնել, թե՝ ոչ։
Կարդացեք նաև
Վերջին յոթ-ութ օրերի ընթացքում կարծում եմ թե մեզ հետ երբևէ համագործակցություն ունեցած կամ երբևէ նույնիսկ նախկինում որևէ գործակցություն չունեցող միջազգային առաջատար երկու տասնյակ ընկերությունների հետ ինտենսիվ աշխատել ենք, սակայն մինչև այս պահի վերջի լուսանկարները, որ որևէ ընկերությունից մեզ հայտնել են, որ արվել է տվյալ տեղանքում, ապրիլի 26-ին է թվագրվում, ինչը ավելի վաղ ժամկետ է, քան դեպքն է տեղի ունեցել»։
Տաթև ՀԱՐՈՒԹՅՈՒՆՅԱՆ
