Հնդկաստանը էլեկտրոնային հարթակներում բոյկոտ է սկսել թուրքական ծագում ունեցող ապրանքների և ծառայությունների դեմ։ Մասնավորապես որոշում է կայացվել դադարեցնել Թուրքիայից ներմուծվող տեքստիլ ոլորտին պատկանող մի շարք ապրանքանիշների մուտքը Հնդկաստան, հայտնում է Ermenihaber-ը։
Թուրքական հայտնի «Trendyol», «LC Waikiki», «Koton», «Mavi» ապրանքնանիշների հագուստեղենի կարգավիճակն այժմ ցուցադրվում է «պահեստում չկա» ձևով։
Բացի այդ Հնկաստանում բոյկոտի է ենթարկվում նաև թուրքական գյուղմթերքը։ Մասնավորապես Պրայագրաջ քաղաքի մի շարք խանութներում դադարեցվել են թուրքական խնձորի վաճառքը։
Հնդիկ մրգավաճառը բոյկոտի վերաբերյալ նշել է. «Մենք միշտ աջակցել ենք Թուրքիային, բայց նրանք դավաճանեցին մեզ»։
Կարդացեք նաև
Ինչպես հայտնում է The Economic Times-ը, հնդիկ առևտրականները հայտարարել են նաև Ադրբեջանին բոյկոտելու մասին՝ կապված Հնդկաստանի հետ վերջին ռազմական հակամարտության ժամանակ Պակիստանին Անկարայի և Բաքվի կողմից ցուցաբերված աջակցության հետ:
Ավելի վաղ Հնդկաստանի ավելի քան 24 նահանգների գործարար առաջնորդներ հավաքվել էին Դելիում՝ այս հարցի վերաբերյալ վերջնական որոշում կայացնելու համար:
«Առևտրի առաջնորդների համաժողովում կոլեկտիվ որոշում է կայացվել դադարեցնել Թուրքիայի և Ադրբեջանի հետ ամբողջ առևտուրը… Պատճառը պարզ է. Թուրքիան և Ադրբեջանը բացահայտորեն աջակցել են Պակիստանին՝ Հնդկաստանի դեմ…», – հանդիպումից հետո լրատվամիջոցներին ասել է պատգամավոր, Հնդկաստանի առևտրականների կոնֆեդերացիայի (CAIT) գլխավոր քարտուղար Պրավին Խանդելվալը:
Նա նշել է, որ այդ երկրներից ներմուծում կամ արտահանում չի իրականացվի։
Հնդկական ընկերություններին նաև կոչ է արվել ֆիլմ կամ գովազդ չնկարահանել Թուրքիայում և Ադրբեջանում։
«Հնդկական կինոարդյունաբերությանը նույնպես խնդրել են՝ չնկարահանել իր ֆիլմերից ոչ մեկը Թուրքիայում և Ադրբեջանում… Շատ ընկերություններ ևս գովազդներ են նկարահանում իրենց արտադրանքի համար այս երկրներում։ Եթե որևէ ընկերություն այսուհետ դա անի, ապա մենք կբոյկոտենք նաև այդ ընկերությունը», – հավելել է Խանդելվալը։
