«Հակակոռուպցիոնը քիչ-քիչ մոտենում է այս դահլիճին․ ապակիներն էլ, ԿՊՊ-ն էլ չի օգնելու»,- Երևանի ավագանու նիստի ժամանակ հայտարարեց «Մայր Հայաստան» խմբակցության ղեկավար Մանուկ Սուքիասյանը՝ անդրադառնալով Երևանի քաղաքապետարանի երկու աշխատակիցների ձերբակալությանը։
«Մայր Հայաստան» խմբակցության ավագանու անդամ Սամվել Հարոյանն իր ելույթում անդրադարձավ սպարապետ Վազգեն Սարգսյանին և իրենց խմբակցության անդամ Գևորգ Ստեփանյանի ընտանիքին պատկանող մեքենան այրելուն, ինչը համարեց քաղաքական պատվեր։
Կարդացեք նաև
Այս ելույթին արձագանքեց «Հանրապետություն» խմբակցության ղեկավար Անի Խաչատրյանը․ «Վազգեն Սարգսյանի մասը սիրուն, տեղին էր ասված, բայց հարց՝ ո՞ւր էր Վազգեն Սարգսյանի թանգարանի բացմանը երկրի նախագահ Ռոբերտ Քոչարյանը։ Բա որ հոկտեմբերի 27-ին Վազգեն Սարգսյանին սպանեցին, ո՞ւր էին ձեր քաղաքական տերերը, խոսում եք մեքենան այրելուց։ Դուք այնքան էժան հայտարարություններ եք անում, որ Վազգեն Սարգսյանին բերում, կապում եք ինչ-որ ավագանու կնոջ մեքենան այրելու հետ։ Ասում էիք, որ պատճառը քաղաքական է, բայց կարծես վարունգը թարս աճեց, ու ստացվեց՝ ձեր անձնական թշնամանքների արդյունքում է»։
Մեսրոպ Մանուկյանն էլ արձագանքեց Անի Խաչատրյանին․ «Ես արձանագրում եմ, որ Անի Խաչատրյանը փաստում է, որ ինքը գիտի, որ Գևորգի դեմ ոտնձգությունն անձնական բնույթի է»։
Այս ընթացքում Անի Խաչատրյանը միջամտեց։ Մեսրոպ Մանուկյանը վրդովվեց․ «Խոսում եմ, ձենդ կտրի, ես չէի խանգարում քեզ։ «Հանրապետությունը» կարողանում է ուղղորդել քննչական մարմիններին մարդկանց վրա գործ հարուցելու, բայց փաստում եք, որ Գևորգի ավտոմեքենայի հրկիզումը անձնական պատճառ ունի, այդ դեպքում ինչո՞ւ նույն տրամաբանությամբ չեք գնում, քննչական մարմնին հաղորդում տաք»։
Տաթև ՀԱՐՈՒԹՅՈՒՆՅԱՆ
