«Կովկասյան բարոմետր» հետազոտության համաձայն՝ հարցված ՀՀ բնակիչների 31,5 տոկոսը հետաքրքրված է ներքին քաղաքական կյանքով, ընդհանրապես հետաքրքրված չէ հարցվածների 22,7 տոկոսը: Միջազգային քաղաքականությամբ հետաքրքրված է հարցվածների մոտ 16 տոկոսը:
ՀՀ առջեւ ծառացած հիմնական 5 խնդիրներից հարցված բնակիչների 44 տոկոսը նշել է երկրում խաղաղության պակասը, 10 տոկոսը չլուծված տարածքային կոնֆլիկտները, 8 տոկոսը՝ անվտանգության խնդիրները, 4 տոկոսը՝ քաղաքական անկայունություն , 4 տոկոսն էլ բանակի զարգացման բացակայությունը:
Ի դեպ, 2021-ի համեմատ 2024-ին երկրում խաղաղության պակասը առաջին մեծ խնդիրը համարողների թիվն աճել է: 2021-ին այդ կարծիքին էին 41 տոկոսը:
Կարդացեք նաև
Հարցված բնակիչների մեծամասնությունը՝ մոտ 60 տոկոսը, լիովին վստահում է իրենց դավանած կրոնի հաստատություններին, երկրորդ տեղում բանակն է, հետո առողջապահական համակարգը, 4-րդ տեղում ոստիկանությունն է… նախավերջին տեղում լրատվամիջոցներն են, իսկ վերջին տեղում քաղաքական կուսակցություններն են, որոնց ի դեպ, հարցվածների մոտ 50 տոկոսը բոլորովին չի վստահում:
Թե որ կառույցին են ավելի շատ վստահում, հարցվածների մոտ 60 տոկոսը հայտնել է մարդու իրավունքների պաշտպանին, հարցվածներին լիովին վստահություն չեն ներշնչել տեղական իշխանությունները:
Դատարանները Հայաստանում կողմնակալ են,- այսպիսի գնահատական են տվել հարցվածների 70 տոկոսից ավելին: Հարցվածների մեծամասնությունը՝ մոտ 50 տոկոսը այն կարծիքին է, որ մարդիկ պետք է մասնակցեն իշխանության դեմ բողոքի ակցիաներին, որովհետեւ դա ցույց է տալիս, որ իշխանությունը ժողովրդի ձեռքում է:
Եթե խորհրդարանական ընտրություններ տեղի ունենային գալիք կիրակի, կմասնակցե՞ք , այս հարցին հարցվածների մեծամասնությունը՝ 45,4 տոկոսը հայտնել է, որ միանշանակ կմասնակցի, միանշանակ չեն մասնակից հարցվածների 33, 6 տոկոսը:
Հիշեցնենք, որ այս հարցումները ՀՀ 10 մարզում եւ Երեւանում անցկացվել են 1561 քաղաքացիների շրջանում 2024 թվականի հուլիս-օգոստոս ամիսներին: Հետազոտության նախաձեռնությունը հետազոտական ռեսուրսների կովկասյան կենտրոն-Հայաստան հիմնադրամինն է:
Արփինե ՍԻՄՈՆՅԱՆ
