«Ցանկացած իշխանության պարագայում փոքր և միջին բիզնեսին վերաբերող որոշումները շատ զգայուն հարցեր են, որոնք պահանջում են հետադարձ կապ և անպայման ականջալուր լինել ոլորտի ներկայացուցիչների ահազանգերին»,- «Մայր Հայաստան» շարժման նախաձեռնությամբ անցկացվող «Փոքր ու միջին բիզնեսի զարգացման հեռանկարները և հարկային քաղաքականության ազդեցությունը ոլորտի վրա» թեմայով քննարկման ժամանակ հայտարարեց Երեւանի ավագանու «Մայր Հայաստան» ընդդիմադիր խմբակցության ղեկավար Մանուկ Սուքիասյանը։
Նա փաստեց՝ զարգացած երկրներում փոքր և միջին բիզնեսն ունի իր քաղաքական շահերն արտահայտող քաղաքական ուժեր տվյալ երկրի խորհրդարանում․ «Սա նրա համար է, որ ոչ թե մարդիկ իրենց բանուգործը թողնեն, գան կառավարութան դիմաց կանգնեն, սկզբից ասեն՝ քաղաքական չէ, հետո հասկանան, որ քաղաքական է, քանի որ քաղաքական իշխանությունն է որոշում կայացնում, այլ պատվիրակեն այն քաղաքական ուժին, որը կգտնվի խորհրդարանում և այնտեղ դա կբարձրացնի։ Քանի դեռ ՓՄՁ-ն չունի իր շահերն արտահայտող քաղաքական ուժ, մշտապես բախվելու է նման խնդիրների։ Դա անխուսափելի է։ Անելիքը երկուստեք է։
Քաղաքական ուժերը բացի անվտանգային խնդիրներից, իրավական, կոռուպցիային վերաբերող հարցերից, իրենց ծրագրերում պետք է ամրագրեն, որ վերցնում են փոքր ու միջին բիզնեսի շահերը խորհրդարանում բարձրանելու պատասխանատվություն։ Եթե դա չլինի, իր հերթին էլ ՓՄՁ-ներն են հեռանալու քաղաքական ուժերից»։
Մանուկ Սուքիասյանի կարծիքով՝ ՓՄՁ-ները պետության անգին գործընկերներն են․ «Այդ մարդիկ սոցիալական խնդիր չեն ստեղծում․ իրենց հանապազօրյա հացը լուծում են, աշխատատեղեր են ստեղծում, մի բան էլ հարկ են վճարում։ Դա գնում, դառնում է աշխատավարձ ու թոշակ։ Պետությունը պետք է ականջալուր լինի ՓՄՁ խնդիրներին»։
Կարդացեք նաև
Տաթև ՀԱՐՈՒԹՅՈՒՆՅԱՆ
