Հակակոռուպցիոն քրեական դատարանում այսօր Ռոբերտ Քոչարյանի եւ մյուսների գործով դատական նիստը հետաձգվեց գործով մեղադրյալ, ԱԺ «Հայաստան» խմբակցության ղեկավար Սեյրան Օհանյանի բացակայության պատճառով: Այսօրվա նիստին ներկա չէին ո՛չ պարոն Օհանյանը, ո՛չ նրա պաշտպան Կարեն Մեժլումյանը:
Վերջինս դատարան էր ներկայացրել բժշկական տեղեկանք, ըստ որի՝ պարոն Օհանյանը գտնվում է ստացիոնար բուժման մեջ, ունի առողջական խնդիրներ:
«Առողջություն մաղթենք, պարոն Օհանյանին»,- ասաց նիստը նախագահող դատավոր Սարգիս Պետրոսյանը՝ շեշտելով, որ հաշվի առնելով, որ մեղադրյալի ներկայությունը նիստերին պարտադիր է, առանց նրա չեն կարող դատաքննությունը շարունակել:
Գործով մեղադրյալ, ԱԺ «Հայաստան» խմբակցության մեկ այլ պատգամավոր Արմեն Գեւորգյանն էլ դատարանին հիշեցրեց, որ մայիսի 18-ին, երբ մեկնել էր Լեհաստան՝ մասնակցելու ԵԽԽՎ դիտորդական առաքելության կազմում նախագահական ընտրություններին, դեռ այդ ժամանակ կային կասկածներ, որ ընտրությունների երկրորդ փուլ է լինելու: Ըստ Գեւորգյանի՝ այդպես էլ եղավ, հունիսի մեկին տեղի է ունենալու այդ ընտրությունների երկրորդ փուլը, դրանով պայմանավորված ՝ Գեւորգյանը խնդրեց մայիսի 29-ից հունիսի 3-ը թույլատրել իր բացակայությունը: Դատարանը բավարարեց նրա միջնորդությունը եւ հաջորդ նիստը նշանակեց հունիսի 17-ին:
Կարդացեք նաև
Արփինե ՍԻՄՈՆՅԱՆ
