Այսօր Երեւանում հրավիրած ասուլիսում Ֆրանսիայի արտաքին գործերի նախարար Ժան-Նոել Բարոն անդրադարձավ հարցին, թե Ֆրանսիան Ադրբեջանի կողմից Հայաստանի վրա հարձակման վտանգ տեսնո՞ւմ է։
Օրերս ԱՄՆ պետքարտուղար Մարկո Ռուբիոն ասել էր, որ Ադրբեջանի և Հայաստանի միջև հակամարտության իրական ռիսկը պահպանվում է։
«Մենք աջակցել ենք հայկական իշխանության ջանքերին՝ հասնելու Ադրբեջանի հետ խաղաղության համաձայնագրին։ Եվ երբ երկու կողմից քաղաքական համաձայնության հասան, մենք ողջունել ենք եւ քաջալերել ենք Ադրբեջանին՝ ստորագրելու այս համաձայնագիրը։ Այս տարածաշրջանը հաղորդակցության շատ կարեւոր հանգույց է Եվրոպայի համար, եւ շատ կարեւոր է, որ այդ համաձայնագիրը ստորագրվի։ Մի քանի շաբաթ առաջ նորից լարվածություններ ի հայտ եկան, մենք զսպվածության կոչ արեցինք, որովհետեւ այսքան մոտ լինելով խաղաղությանը՝ իսկապես ողբերգական կլիներ, որ բռնության պատճառով եւս մեկ անգամ հարցականի տակ դրվի խաղաղությունը։ Ես եւս մեկ անգամ նշում եմ, որ մենք ցանկանում ենք, որ քաղաքական համաձայնության կարողանան գալ, եւ համաձայնագիրը ստորագրվի»,- ասաց Ժան-Նոել Բարոն։
ՀՀ ԱԳ նախարար Արարատ Միրզոյանն ասաց, որ Ադրբեջանը նշում է պայմաններ, որոնց կատարումը, ըստ ադրբեջանական կողմի, պետք է ավելի դյուրինացնի խաղաղության պայմանագրի կնքումը։ «Ինչ վերաբերում է պայմանների մի խմբին, օրինակ, Մինսկի կառույցներին, ապա օրակարգը մեզ համար քննարկելու է, եթե չկա կոնֆլիկտ, ապա չկա նաեւ կոնֆլիկտով զբաղվող կառույցների անհրաժեշտություն»,- ասաց Միրզոյանը՝ անդրադառնալով նաեւ Հայաստանի Սահմանադրության վերաբերյալ Ադրբեջանի պահանջներին։
Կարդացեք նաև
Մանրամասները՝ տեսանյութում
Ռոզա ՀՈՎՀԱՆՆԻՍՅԱՆ
