«Հետք». Մայիսի 12-ին Սնանկության դատարանը հաստատել է «Հայկական ազգային ավիաուղիներ» ՓԲԸ-ի (առավել հայտնի է «Ֆլայ Արնա» ապրանքանիշով) պարտատերերի վերջնական ցուցակը:
Հիշեցնենք, որ ավիափոխադրողը սնանկ է ճանաչվել այս տարվա հունվարի 27-ին իռլանդական Impact Aviation Services Limited-ի դիմումի հիման վրա: Վերջինս «Ֆլայ Արնային» վարձակալությամբ օդանավեր հանձնած ընկերությունն է: Միաժամանակ այն ամբողջությամբ պատկանում է արաբական Air Arabia-ին, այսինքն՝ դրա դուստր ընկերությունն է:
Հարցն այն է, որ «Ֆլայ Արնայի» 49 տոկոսն էլ պատկանում է Air Arabia-ի մեկ այլ դուստր ձեռնարկության՝ արաբական International Business Company (FZE)-ին, եւս 49 տոկոս պատկանում է Հայաստանի պետական հետաքրքրությունների ֆոնդին (ԱՆԻՖ), իսկ մնացած 2 տոկոսի տերը լիբանանահայ տնտեսագետ, գործարար Վարուժան Ներգիզյանն է: Մյուս կողմից՝ «Ֆլայ Արնան» կառավարող ընկերությունը եղել է հենց Air Arabia-ն: Այսինքն՝ վերջինս իր իռլանդական դստեր միջոցով սնանկության է տարել «Ֆլայ Արնային», որի կառավարիչը հենց ինքն էր, սակայն կառավարման հարցերի շուրջ 2023-ի աշնանից հակասության մեջ էր հայկական կողմի (ԱՆԻՖ/ՀՀ կառավարություն) հետ:
Գրել էինք, որ հունվարի 27-ին կայացված սնանկության վճռից առաջ եւ հետո «Ֆլայ Արնայից» որեւէ արձագանք այդպես էլ չի եղել, այդ թվում՝ ընկերությունը չի բողոքարկել իր սնանկությունը: Այդպես էլ պետք է լիներ, քանի որ ընկերությունը 2024-ի գարնանից չուներ կառավարիչ. մարտին «Ֆլայ Արնայի» աշխատողները ծանուցումներ էին ստացել այն մասին, որ մայիսին պայմանագրերը լուծվելու են, իսկ ընկերության գլխավոր գործադիր տնօրեն Էնթոնի Փրայսը, որը Air Arabia-ի ներկայացուցիչն էր, ապրիլի վերջին հեռացել էր Հայաստանից, այլ կերպ ասած՝ արաբական կողմը հրաժարվել էր ավիափոխադրողի կառավարումից, եւ հայկական ու արաբական բաժնետերերն այդպես էլ համաձայնության չեկան նոր տնօրեն նշանակելու հարցում:
Կարդացեք նաև
Այսպիսով՝ 2025 թ. փետրվարի 10-ից պարտատերերն սկսել են ներկայացնել իրենց պահանջները: Մարտի 14-ին սնանկության գործով կառավարիչ Սոֆյա Դավթյանը դատարան է ներկայացրել պահանջների նախնական ցուցակը, որը հետո որոշակի փոփոխությունների է ենթարկվել:
Վերջնական ցուցակը դատարանը հաստատել է մայիսի 12-ին: Դրանում տեղ է գտել 42 պահանջ, ընդ որում՝ բոլորը չապահովված պահանջներ են (ապահովված են համարվում այն պահանջները, որոնք ծանրաբեռնված են գրավով կամ երաշխիքով (երաշխավորությամբ)): Պարտատերերը գլխավորապես ֆիզիկական անձինք են՝ «Ֆլայ Արնայի» նախկին աշխատակիցները, որոնց աշխատավարձերն այդպես էլ չվճարվեցին: Վերջիններիս պահանջների չափը տատանվում է 625 հազարից մինչեւ 11 մլն դրամի սահմաններում: Նախկին աշխատակիցների պահանջները, ինչպես սահմանված է «Սնանկության մասին» օրենքում, ընդգրկված են «գ» հերթում:
Պարտատերերի մեջ կան նաեւ մի քանի ընկերություններ՝ հայկական ու արտասահմանյան, այդ թվում՝ օդանավերի վարձատու Impact Aviation Services Limited-ը (ընդհանուր պահանջի չափը՝ շուրջ 780 հազ. դոլար), ինչպես նաեւ ավիացիոն ոլորտին ՏՏ ծառայություններ մատուցող արաբական Information Systems Associates FZE-ն (628 հազ. դոլար), որոնք երկուսն էլ Air Arabia-ի դուստրերն են:
Սրանք ամենախոշոր պարտատերերն են, սակայն նրանց պահանջներն ընդգրկվել են ավելի ցածր՝ «է» հերթում: Նույնը վերաբերում է ռուսական FF Cargo Services ընկերությանը, որը եղել է ՌԴ-ում «Ֆլայ Արնայի» բեռների վաճառքի գործակալ եւ պահանջում է 130 հազ. դոլար: Այլ կերպ ասած՝ մինչեւ ամբողջությամբ չբավարարվեն «գ» հերթի պահանջները, այս ընկերություններին հերթ չի հասնի: Բայց ամբողջ հարցն այն է, թե արդյոք «Ֆլայ Արնան» այդքան գույք ունի, որի իրացումից գոյացած միջոցներով հնարավոր կլինի փակել թեկուզ նախկին աշխատակիցների պարտքերը:
Վահե Սարուխանյան
Նյութն ամբողջությամբ՝ սկզբնաղբյուր կայքում:
