«Վերջերս տեղեկություն ստացանք, որ Մխչյան գյուղում բարձր դասարանի աշակերտները չորրորդ դասարանի աշակերտին ամիսներ շարունակ հետապնդել են, ստիպել են թմրանյութ օգտագործել, այնուհետեւ գումար են շորթել։ Քննչական կոմիտեն հայտնեց, որ չորս անձի նկատմամբ քրեական հետապնդում է հարուցվել։ Արդյոք այս ընթացքում կանխարգելիչ աշխատանքներ չեն իրականացվե՞լ։ Կարդում եմ եւ տեսնում, որ մեղադրյալներից երկուսի նկատմամբ դաստիարակչական աշխատանքներ են տարվում, խնդրում եմ պարզաբանեք՝ ի՞նչ է կատարվում»,- ԱԺ նստաշրջանում ՆԳ նախարարի տեղակալ Արմեն Մկրտչյանին հարցրեց «Հայաստան» խմբակցության պատգամավոր Գառնիկ Դանիելյանը։
ՆԳ փոխնախարարն ասաց, որ կանխարգելիչ աշխատանքներ իրականացվում են, դա համայնքային ոստիկանության գործառույթն է։ «Այն, որ այս ուղղությամբ կատարելագործվելու եւ կարողությունները զարգացնելու աշխատանքներ կան անելու, սա եւս ընդունում ենք, որ կա։ Եվ ՆԳՆ-ն թե երկարաժամկետ, թե կարճաժամկետ առումով լուծումների հետեւից է գնում, այդ թվում՝ հստակ ռազմավարություններ ընդունելով։ Ինչ վերաբերում է ընտրված խափանման միջոցներին, սա ՆԳՆ տիրույթից դուրս է, քննիչն է գնահատում եւ ընտրում խափանման միջոցը, միջնորդում դատարանին»,- նշեց Արմեն Մկրտչյանը։
Գառնիկ Դանիելյանը հավելեց, որ այս հարցով կոմպրոմիսի չպետք է գնալ, իրենց պարտականությունների մեջ թերացողները պետք է պատասխանատվության ենթարկվեն։ «Այսինքն՝ ամիսներ շարունակ այդ պրոցեսը գնացել է, եւ կանխարգելիչ միջոցառումներ չեն իրականացվել»,- ասաց նա։
Մանրամասները՝ տեսանյութում
Կարդացեք նաև
Ռոզա ՀՈՎՀԱՆՆԻՍՅԱՆ
