ՀՀ սփյուռքի գործերի գլխավոր հանձնակատար Զարեհ Սինանյանը Ֆրանսիա կատարած աշխատանքային այցի շրջանակում մայիսի 27-ին Լիոնի մետրոպոլիայի Դեսին-Շարպիո քաղաքում հանդիպել է տեղի հայ համայնքի ակտիվ ներկայացուցիչների և երիտասարդների հետ։
Հանդիպմանը մասնակցել են նաև Դեսին-Շարպիոյի փոխքաղաքապետ Դենիս Ջորկաեֆը (Denis Djorkaeff), Վիենի փոխքաղաքապետ Լևոն Սաքունցը, Ֆրանսիայում Սփյուռքի գործերի հանձնակատար Ռոբերտ Տեր-Արսենյանը, ինչպես նաև Ֆրանսիայում Հայաստանի և Հայ դատի պաշտպանության ճակատ (FDACAF) ասոցիացիայի նախագահ, «Laïcité et République Sociale» կազմակերպության նախագահ և «Հայկական շարժում» կազմակերպության գլխավոր պատվիրակ Ադրիեն Վահագն Սաժը, «Հայկական շարժում» կազմակերպության նախագահ Ժակ Ռաֆֆի Փափազյանը և այլք։
Հանդիպման ընթացքում մասնակիցներն ընդգծել են Դեսին-Շարպիոյի և Հայաստանի Ստեփանավան քաղաքի միջև՝ դեռևս 1991 թվականին ձևավորված քույր քաղաքների կապերի ամրությունն ու այդ գործընկերության հետևողական զարգացումը։
Այս համատեքստում զրուցակիցները կարևորել են նաև հունիսի 2-3-ը Գորիսում կայանալիք Հայ-ֆրանսիական ապակենտրոնացված համագործակցության հինգերորդ համաժողովի նախապատրաստական աշխատանքները՝ որպես երկկողմ հարաբերությունների խորացման և համայնքային համագործակցության զարգացման հերթական հարթակ։
Կարդացեք նաև
Գլխավոր հանձնակատարը բարձր է գնահատել Դեսին-Շարպիոյի քաղաքապետարանի և ողջ քաղաքային խորհրդի հետևողական աջակցությունը՝ ուղղված Հայաստանին և հայ ժողովրդին վերաբերող հարցերին։
Քննարկման ընթացքում անդրադարձ է կատարվել նաև համայնքային խնդիրներին, դրանց հաղթահարման ուղիներին և երիտասարդների ներգրավման հնարավորություններին։
Հանդիպումից հետո Զարեհ Սինանյանն առանձին հանդիպում է ունեցել քաղաքի հայ երիտասարդների հետ, ներկայացրել Գլխավոր հանձնակատարի գրասենյակի գործունեությունը, ծրագրերն ու առաջնահերթությունները, ինչպես նաև պատասխանել նրանց հուզող հարցերին և մտահոգություններին։
Սփյուռքի գլխավոր հանձնակատարի գրասենյակ
