Մայիսի 26-ին «Երևանյան երկխոսություն» միջազգային համաժողովի շրջանակներում ՀՀ ԱԳ նախարարի տեղակալ Ռոբերտ Աբիսողոմոնյանը մասնակցել և բացման խոսքով հանդես է եկել «Թվային հանրային ենթակառուցվածքները դիմադրողականության և ներառականության համար. խթանելով մարդու իրավունքներն առցանց» բարձրաստիճան քննարկմանը։
Միջոցառումը կազմակերպվել է ՀՀ ԱԳ նախարարության կողմից՝ Էստոնիայի ԱԳ նախարարության և «Ազատություն առցանց կոալիցիայի» հետ համատեղ ջանքերով։ Քննարկմանը մասնակցել են Էստոնիայի ԱԳՆ գլոբալ հարցերով փոխնախարար Մինա-Լինա Լինդը, ՀՀ բարձր տեխնոլոգիական արդյունաբերության նախարարի առաջին տեղակալ Գևորգ Մանթաշյանը, ինչպես նաև մի շարք տեղական և միջազգային կազմակերպությունների, քաղաքացիական հասարակության ներկայացուցիչներ, փորձագետներ:
ՀՀ ԱԳ նախարարի տեղակալ Ռոբերտ Աբիսողոմոնյանն իր խոսքում ընդգծել է թվային տեխնոլոգիաների կարևորությունը փոքր պետությունների համար՝ զարգացման, թվային դիմադրողականության և անվտանգության տեսանկյունից։ Այս համատեքստում անդրադարձ է կատարվել թվային աշխարհում մարդու իրավունքների պաշտպանության կարևորությանը, մասնավորապես՝ անվտանգ, բաց և արժանապատիվ թվային հանրային ենթակառուցվածքների մշակման և ներդրման հարցերին։
Ծանոթագրություն․ Հայաստանը միացել է «Ազատություն առցանց կոալիցիային» 2024 թվականի դեկտեմբերի 3-ին՝ ստանալով բոլոր անդամ-պետությունների միաձայն աջակցությունը և դառնալով կոալիցիայի 42-րդ անդամը։ Ներկայումս Կոլիացիան նախագահում է Էստոնիան։
Կարդացեք նաև
ՀՀ ԱԳՆ
