Ավստրիայի Հայ Առաքելական Եկեղեցական Համայնքի Վարչությունը խոր մտահոգությամբ է անդրադառնում ՀՀ վարչապետ Նիկոլ Փաշինյանի և իր տիկնոջ՝ Հայ Առաքելական Սուրբ Եկեղեցու և նրա Եպիսկոպոսաց դասի հասցեին հնչեցրած վիրավորական արտահայտություններին։
Նման դատապարտելի կեցվածքն անընդունելի է ոչ միայն յուրաքանչյուր քրիստոնյայի, առավել ևս՝ Հայ Առաքելական Եկեղեցու զավակի համար, այլև խորապես հակասում է պետական առաջնորդի դիրքին և նրան վայել զսպվածությանն ու պատասխանատվությանը։ Այդպիսի խոսքն անհարիր է մեր ժողովրդի դարերով կերտված հոգևոր-բարոյական արժեհամակարգին և խաթարում է ազգային միասնության ու փոխադարձ հարգանքի մթնոլորտը։
Հայ Առաքելական Սուրբ Եկեղեցին դարեր շարունակ եղել է հայ ժողովրդի հոգևոր կյանքի առանցքը, նրա ինքնության, պատմության ու մշակույթի կենդանի պահապանը։ Եկեղեցու Եպիսկոպոսաց դասը կոչված է հովվելու հավատացյալ ժողովրդին և ամրապնդելու եկեղեցու միասնությունն ու ամրությունը։ Նրանց հասցեին հնչեցված անարգանքը ոչ միայն վիրավորական է, այլ նաև վտանգավոր՝ որպես ոտնձգություն մեր հոգևոր ինքնության և հասարակության խաղաղ համակեցության հանդեպ։
Հետևաբար կոչ ենք անում ՀՀ վարչապետին հրապարակայնորեն զղջալ իր խոսքերի համար և ներողություն խնդրել Հայ Առաքելական Սուրբ Եկեղեցուց ու մեր հավատացյալ ժողովրդից։
Կարդացեք նաև
Աղոթում ենք, որպեսզի Աստված մեր ժողովրդին պարգևի խաղաղություն, իմաստություն և փոխադարձ հարգանք՝ վստահ լինելով, որ մեր Սուրբ Եկեղեցին՝ հավատարիմ իր աստվածահաճո առաքելությանը, շարունակելու է սիրո, համբերության և հույսի ճանապարհով առաջնորդել իր զավակներին։
Ավստրիայի Հայ Առաքելական Եկեղեցական Համայնքի Վարչություն
