Գրականության և արվեստի թանգարանը հանդիսավորությամբ ներկայացրել է «Հիշողության սլաքներ» խորագրով ժամանակավոր ցուցադրությունը, որի առանցքում հայ մշակույթի մեծերի անձնական ժամացույցներն են՝ յուրաքանչյուրն իր պատմությամբ ու խորհրդով։
Ցուցադրված ժամացույցների սլաքները կանգ են առել մեր գրականության ու արվեստի երախտավորների կյանքի որոշակի կետում կամ երբեմն երբ նրանք այլևս ողջ չեն եղել՝ փոխակերպվելով անցյալն ու ապագան կամրջող մշակութային արձանագրիչների։ Ցուցադրությանը ներկայացված են շուրջ 60 ժամացույցներ, որոնց շարքում առանձնանում են Հովհաննես Թումանյանի, Ավետիք իսահակյանի, Ակսել Բակունցի, Վահրամ Փափազյանի, Մարտիրոս Սարյանի, Արամ Խաչատրյանի և այլ մշակութային գործիչների անձնական ժամացույցները։ Այս հավաքածուում միայն Բարսեղ Կանաչյանի ժամացույցն է շարունակում աշխատել մինչ օրս՝ դառնալով ժամանակի խոսուն վկան։
Գրականության և արվեստի թանգարանի տնօրեն Սյուզաննա Խոջամիրյանը հատուկ շնորհակալություն է հայտնել ՀՀ ԿԳՄՍ նախարարությանը, նախագծի հովանավոր AWI International ընկերությանը և գործընկեր թանգարաններին՝ այս բացառիկ ցուցադրությանն աջակցելու համար։
«Ցուցադրությունը փաստում է այն մասին, որ այստեղ, այս պահին ժամանակը կանգ է առել՝ վերափոխվելով հիշողության։ Առաջին անգամ է, որ մեկ վայրում ներկայացվում են մեր գրականության, երաժշտության, թատրոնի և կինոյի երևելիների անձնական ժամացույցները։ Ժամացույցներ, որոնք ուղեկիցն են եղել այս մարդկանց ստեղծագործական ամբողջ կյանքի և որոնց սլաքներն այսօր ցույց են տալիս ոչ թե թվեր, այլ պատմություններ, ապրած պահեր ու հիշողություններ»,- նշել է Սյուզաննա Խոջամիրյանը։
«Հիշողության սլաքներ» ցուցադրությունը կգործի 1438 ժամ 120 րոպե` մայիսի 31-ից մինչև հուլիսի 30-ը։
Գրականության և արվեստի թանգարան
