«Երբ այսօր խոսում էի 238 միլիարդ աշխատավարձի մասին, պետք է ասեմ, որ պետական կառավարման համակարգի աշխատավարձը այդ ամեն ինչի մեջ փոքր է 5 տոկոսից: Այդ շահարկումները, որ կան, թե պարգեւատրումներ մի ստացեք, թոշակները բարձրացրեք… այդ մեծադղիրդ պարգեւատրումները եւ այլն: Եթե օրինակ 2025-ի ապրիլին ամբողջ պետական համակարգը չստանար աշխատավարձ, 0 աշխատավարձ ստանար, ապրիլին թոշակները հնարավոր կլիներ բարձրացնել 1400 քանի դրամով»,– այսօր ԱԺ-ում 2024 թվականի պետական բյուջեի կատարման տարեկան հաշվետվությունը ներկայացնելիս ասաց վարչապետ Նիկոլ Փաշինյանը:
Նա նկատեց, որ կա մի նրբություն. «Այդ թոշակը, որը այդ համակարգին աշխատավարձ չտալով՝ կարելի էր 1500 դրամով բարձրացնել, ենթադրենք՝ մարդը ստանում է 30.000 դրամ թոշակ ու ապրիլին որոշել էինք, որ վե՛րջ, այս ամիս պետական համակարգը աշխատավարձ չի ստանում ու արդյունքում թոշակառուն պետք է ստանար 31,5000 թոշակ: Որոշումը կլիներ, բայց թոշակառուների 70 տոկոսը այդ թոշակը չէր ստանա ֆիզիկապես, որովհետեւ հռչակված կլիներ, բայց այն համակարգը, որ պետք է թոշակը A կետից հասցներ B կետ, այդ համակարգը գոյություն չէր ունենա: Լա՛վ, մեկ, երկու, երեք ամիս գոյություն ունենար, չորորդ ամիսը գոյություն չէր ունենա: Ոչ մեկը չէր համաձայնի առանց աշխատավարձի աշխատել: Եթե համաձայնեին առանց աշխատավարձի աշխատել, ուրեմն մի բան այն չէ: Ժողովուրդը պետք է մտածեր՝ թույլ տալի՞ս է առանց աշխատավարձի աշխատեն, թե՞՝ ոչ»:
Արփինե ՍԻՄՈՆՅԱՆ
