Շվեդիայի ազգային տոնին ընդառաջ, Հայաստանի Հանրապետության նախագահ Վահագն Խաչատուրյանն ընդունել է Հայաստանում Շվեդիայի արտակարգ և լիազոր դեսպան Պատրիկ Սվենսոնին։
Նախագահը շնորհավորել է դեսպանին և ի դեմս նրա՝ Շվեդիայի բարեկամ ժողովրդին ազգային տոնի կապակցությամբ՝ մաղթելով խաղաղություն, առաջընթաց և բարօրություն։
«Շնորհակալություն եմ հայտնում նաև սերտ համագործակցության, և այն անկեղծ վստահության համար, որ կա Հայաստանի Հանրապետության նկատմամբ, ինչը պայմանավորված է մեր երկրում համատեղ տարբեր ծրագրերի իրականացմամբ, որոնք աջակցում են ժողովրդավարությանը։
Կարծում եմ՝ շատ երկրներ հետևում են Ձեր երկրի օրինակին՝ տեսնելով, թե ինչպես է Շվեդիան առանձին հարցերում վերաբերում Հայաստանում տեղի ունեցող բարեփոխումներին։ Կարող եմ ասել, որ շատ դեպքերում դա է պատճառը, որ իրենք ևս միանում են այդ նախաձեռնություններին, որոնք ուղղված են Հայաստանին աջակցելուն՝ տնտեսական, քաղաքական և ընդհանուր բարեփոխումների միջոցով, որոնք միտված են մեկ նպատակի՝ Հայաստանում ժողովրդավարական ինստիտուտների հաստատմանը։ Եվ իհարկե, դա նպաստում է Հայաստանի ինքնիշխանության ամրապնդմանը, ինչպես նաև մեր երկրի անվտանգության և պաշտպանունակության բարձրացմանը»։
Կարդացեք նաև
Պատրիկ Սվենսոնը շնորհակալություն է հայտնել ընդունելության համար։ «Շվեդիայի ազգային տոնի կապակցությամբ ինձ համար պատիվ է հյուրընկալվել այսօր այստեղ։ Շնորհակալություն նաև իմ երկրի վերաբերյալ ջերմ խոսքերի և բարեմաղթանքների համար»,- նշել է դեսպանը։
Հանդիպման ընթացքում կողմերը քննարկել են Հայաստան-Շվեդիա հարաբերությունների զարգացմանը վերաբերող երկկողմ օրակարգային մի շարք հարցեր՝ ընդգծելով քաղաքական երկխոսության ակտիվացման և տարբեր ոլորտներում համագործակցության խորացման կարևորությունը։
Նախագահը բարձր է գնահատել ժողովրդավարության ամրապնդմանն ուղղված բարեփոխումներին Շվեդիայի երկարամյա աջակցությունը՝ ընդգծելով հատկապես կառավարման թափանցիկության, իրավունքի գերակայության, քաղաքացիական հասարակության դերակատարության ընդլայնման և մարդու իրավունքների պաշտպանության ոլորտներում շվեդական փորձի կիրառման արժեքավորությունը։
Զրույցի ընթացքում անդրադարձ է կատարվել երկկողմ համագործակցության ընդլայնման հնարավորություններին քաղաքական, տնտեսական և բարձր տեխնոլոգիաների ոլորտներում։ Նշվել է, որ երկու երկրների միջև տնտեսական կապերի զարգացման համար առկա է զգալի չօգտագործված ներուժ, մասնավորապես՝ ներդրումային ծրագրերի, նորարարական տեխնոլոգիաների փոխանակման և թվային հատվածի համատեղ նախաձեռնությունների միջոցով։
Այս համատեքստում շեշտվել է Շվեդիայի առաջատար բարձր տեխնոլոգիական ընկերություններից «Ericsson»-ի հետ համագործակցության խթանման կարևորությունը։ Երկուստեք կարևորվել են կապի տեխնոլոգիաների և հեռահաղորդակցության ոլորտում համատեղ ծրագրերը, որոնք կնպաստեն Հայաստանի տեխնոլոգիական ներուժի առաջընթացին։
Հանդիպմանը մտքեր են փոխանակվել նաև խորհրդարանական դիվանագիտության զարգացման և գործակցության շարունակականության վերաբերյալ։ Ընդգծվել է, որ միջխորհրդարանական համագործակցությունը կարող է էական խթան հանդիսանալ երկկողմ կապերի խորացման և փոխըմբռնման ամրապնդման գործում։
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԱԽԱԳԱՀԻ ԱՇԽԱՏԱԿԱԶՄ
