«Մայր Հայաստան» ռազմական պատմության թանգարանը կլուծարվի:
ՀՀ կառավարության օրակարգում՝ չզեկուցվող հարցերի շարքում է Հայաստանի Հանրապետության պաշտպանության նախարարության ««Մայր Հայաստան» ռազմական պատմության թանգարան» պետական հիմնարկը «Հայաստանի պատմության թանգարան» պետական ոչ առևտրային կազմակերպությանը միացման ձևով վերակազմակերպելու, «Մայր Հայաստան» ռազմական պատմության թանգարան» մասնաճյուղ ստեղծելու, ինչպես նաև գույք հետ վերցնելու և ամրացնելու, անհատույց օգտագործման իրավունքով գույք հատկացնելու մասին նախագիծը:
Հիմնավորման մեջ նշվում է, որ միավորման նպատակը թանգարանի արդյունավետ կառավարումն է։
«ՀՀ կառավարության 26.04.2016թ. N 736-Ա որոշմամբ ստեղծվել է ՀՀ պաշտպանության նախարարության «Մայր Հայաստան» ռազմական պատմության թանգարան» պետական հիմնարկը, որի գործունեության առարկան են հանդիսանում հայոց ռազմական արվեստի, ճակատամարտերի, ռազմական պատմության վերաբերյալ ցուցադրական նյութերի համալրումը, հաշվառումը, ուսումնասիրումը, պահպանումը և թանգարանային ցուցադրման եղանակով հանրությանը ներկայացնելը, թանգարանի մշտական և ժամանակավոր պահպանությանը հանձնված նմուշների, թանգարանային այլ ցուցանմուշների հաշվառումն ու պահպանումը, թանգարանային առարկաների և թանգարանային հավաքածուների մշտական ու ժամանակավոր հանրային ցուցադրումը և այլն:
Կարդացեք նաև
Թանգարանային գործունեություն իրականացնող մարմինները հիմնականում գործում են պետական ոչ առևտրային կազմակերպությունների կարգավիճակով, միաժամանակ առանձին իրավաբանական անձ ստեղծելու գործընթացից ձեռնպահ մնալու նկատառումներից ելնելով՝ նպատակահարմար է գտնվել «Մայր Հայաստան» ռազմական պատմության թանգարան» պետական հիմնարկը «Հայաստանի պատմության թանգարան» պետական ոչ առևտրային կազմակերպությանը միացման ձևով վերակազմակերպել՝ ստեղծելով «Հայաստանի պատմության թանգարան» պետական ոչ առևտրային կազմակերպության «Մայր Հայաստան» ռազմական պատմության թանգարան» մասնաճյուղ:
Գործընթացը նշված ձևաչափով իրականացնելու նպատակահարմարությունը որոշվել է նախարարական սոցիալական կոմիտեում քննարկման արդյունքներով, ինչպես նաև հիմք ընդունելով ՀՀ քաղաքացիական օրենսգրքի 63-րդ հոդվածի 1-ին և 4-րդ մասերի, 64-րդ հոդվածի 2-րդ մասի, «Պետական ոչ առևտրային կազմակերպությունների մասին» օրենքի 8-րդ հոդվածի 1-ին մասի, 13-րդ հոդվածի 2-րդ մասի «զ» ենթակետի, 3-րդ մասի ու 24-րդ հոդվածի կարգավորումները և հաշվի առնելով նույնական հարաբերություններ կարգավորող ՀՀ կառավարության 14.09.2023թ. N 1537-Ն որոշումը»,- նշված է հիմնավորման մեջ:
Նշվում է նաև, որ որոշման նախագիծը պետական բյուջեում լրացուցիչ ֆինանսական միջոցների անհրաժեշտության և պետական բյուջեում փոփոխությունների չի հանգեցնում:
Հիշեցնենք՝ թանգարանը հիմնականում արտացոլում է 2 թեմա՝ հայ ժողովրդի մասնակցությունը 2-րդ համաշխարհային և Արցախյան ազատագրական պատերազմներին:
