Հայաստանի 2023-2026 թվականների հակակոռուպցիոն ռազմավարության մշակման գործընթացը, որին մասնակցել են բազմաթիվ հասարակական եւ պետական կազմակերպություններ, ԵԽ կոռուպցիայի դեմ պայքարի պետությունների խումբը (GRECO) կենտրոնական իշխանությունում կոռուպցիայի կանխարգելմանը նպաստելու օրինակելի միջոց է որակում։
Այս մասին ասվում է GRECO-ի 24-րդ ընդհանուր զեկույցում։
«Երեքամսյա ժամանակահատվածում խումբն անցկացրել է տասը նիստ՝ ինչպես ամբողջական կազմով, այնպես էլ մասնագիտական թեմատիկ ենթախմբերով։ 2023 թ. օգոստոսի 23–24-ին տեղի են ունեցել ռազմավարության շուրջ հանրային քննարկումներ, որոնց մասնակցել է մոտ 80 ներկայացուցիչ ոլորտային հասարակական կազմակերպություններից, պետական մարմիններից և դոնոր կազմակերպություններից։ Քննարկումներն ապահովել են հարթակ՝ առաջարկներ ներկայացնելու, օրենսդրական և կիրառական խնդիրներ բարձրաձայնելու, ինչպես նաև ռազմավարության կատարելագործման առաջարկներ ներկայացնելու համար: Ռազմավարության իրականացումը մշտապես վերահսկելու նպատակով ստեղծվել է նաև աշխատանքային խումբ…», – նշվում է զեկույցի Հայաստանին վերաբերելի համառոտ հատվածում։
Ըստ զեկույցի՝ մինչեւ 2024 թվականի ավարտը ՀՀ պատգամավորներին ներկայացված ԵԽ GRECO-ի հակակոռուպցիոն յոթ առաջարկներից ամբողջապես իրականացվել է դրանց 71,4%-ը, մասամբ իրականցվել է առաջարկների մնացյալ 28,6%- ը, ՀՀ դատավորներին ներկայացված տասը առաջարկներից ամբողջապես իրականացվել է 60%-ը, մասամբ իրականացվել է մնացյալ 40%-ը, ՀՀ դատախազներին ներկայացված յոթ առաջարկներն էլ ամբողջապես իրականացվել են։
Կարդացեք նաև
Ամփոփ՝ առաջարկների 75%-ն իրականցվել է ամբողջապես, 25%-ը՝ մասամբ։ Համեմատությամբ՝ Ադրբեջանում (որի տվյալները կանգ են առնում 2020-ին – խմբ․) ամբողջապես իրականացվել է 21 առաջարկների 66,7%-ը, մասամբ՝ 19%-ը, առաջարկների 14,3%-ը չի իրականացվել, իսկ հարեւան Վրաստանում (18 առաջարկ) պատկերն այպիսին է․ ամբողջապես՝ 61,1%, մասամբ՝ 33,3%, չեն իրականացվել՝ 5,6%:
Զեկույցն ընդհանրական բնույթ է կրում։ Առանձին երկրների վերաբերյալ առկա է միայն վիճակագրություն։ GRECO-ն մի շարք առաջարկներ է արել մասնակից երկրների համար, որպիսիք են՝ առանցքային են օրենսդրական փոփոխությունները, կիրառկման արդյունավետ մեխանիզմների նախաձեռնումը եւ կանխարգելիչ սանկցիաների ներդնումը։
Արսեն ԱՅՎԱԶՅԱՆ
