«Ազատություն». ԱՄՆ նախագահ Դոնալդ Թրամփը հայտարարել է, որ շատ հիասթափված է Իլոն Մասկի քննադատությունից՝ իր ներկայացրած բյուջետային օրինագծի վերաբերյալ, հավելել, որ չգիտի՝ արդյոք լավ հարաբերությունները կպահպանի միլիարդատեր իր նախկին խորհրդականի հետ:
«Տեսեք, Իլոնի հետ մենք հիանալի հարաբերություններ ունեինք։ Չգիտեմ՝ այլևս այդպիսին կլինեն, թե՝ ոչ։ Ես զարմացած եմ», – Օվալաձև աշխատասենյակում լրագրողներին ասել է Թրամփը, այն բանից հետո, երբ նախկին խորհրդական Մասկը օրինագիծը որակել էր «նողկալի»։
«Ես շատ հիասթափված եմ, քանի որ Իլոնը այս օրինագծի ներքին գործընթացներն ավելի լավ գիտեր, քան այստեղ նստած գրեթե ցանկացած մեկը… Հանկարծ նա խնդիր ունեցավ», – հավելել է Թրամփը։
Այս հայտարարությունից րոպեներ անց Մասկը հակադարձեց X սոցիալական ցանցում՝ ասելով՝ պնդումները, թե ինքը նախապես ծանոթացել է օրինագծին, «սուտ» են։ Մասկը սրեց հանրային վեճը, գրելով. «Առանց ինձ Թրամփը կպարտվեր ընտրություններում»:
