Մեծ հաղթանակի օրը ոչ միայն խիզախության եւ հայրենասիրության օրինակ է ապագա սերունդների համար, այլ մտորելու առիթ` մարդկության համար պատերազմի ավերիչ հետեւանքների մասին․ Երեւանում ընթացող հայ-ռուսական միջխորհրդարանական համագործակցության հանձնաժողովի 39-րդ նիստում հայտարարեց ՀՀ ԱԺ փոխնախագահ Հակոբ Արշակյանը՝ նկատելով, որ երկրորդ Համաշխարհային պատերազմը մարդկության պատմության ամենաողբերգական էջերից է․ միլիոնավոր մարդիկ են զոհվել, այդ թվում՝ նաեւ սովի եւ համաճարակների պատճառով։ Ըստ Հակոբ Արշակյանի, հայ ժողովրդի ավանդն ու մասնակցությունը միասնական հաղթանակի գործում էական է եւ հայ ժողովուրդն առանձնահատուկ հպարտությամբ է հիշում Հայրենական մեծ պատերազմի իր հերոսներին։
Հակոբ Արշակյանը կարեւորում է ոչ միայն այս հիշողությունը, այլ այն սերունդներին փոխանցելը։ Նկատեց՝ այդ նպատակով կան նախաձեռնություններ, որոնց աջակցել է պետք, օրինակ «Հիշողության գնացքը»։ Միասնական հաղթանակի կերտման գործում, Հակոբ Արշակյանը հիշեցրեց, որ մեծ ներդրում է ունեցել նաեւ սփյուռքի հայությունը։
Դառնալով միջխորհրդարանական հանձնաժողովին էլ ասաց՝ այս տարիների ընթացքում հանձնաժողովի աշխատանքը նպաստել է հայ-ռուսական հարաբերությունների խորացմանը։
«Ուկրաինայի եւ Եվրոպայի օրինակով մենք տեսնում ենք, թե ինչ ավերիչ հետեւանքների է բերում պատմական հիշողության ոչնչացումը, ֆաշիզմի գաղափարների ֆետիշացումը, տարածումը եւ հերոսացումը»,- իր խոսքում էլ այսպես ասաց ՌԴ Դաշնային խորհրդի փոխխոսնակ՝ Յուրի Վորոբյովը՝ կարեւորելով հայաստանցի գործընկերների` այլ, տարբերվող դիրքորոշումները, որոնք նպաստում են երկու ժողովուրդների միջեւ փոխհարաբերությունների խորացմանը, երկու երկրների հարաբերությունների զարգացմանը։
Կարդացեք նաև
Հիշեցնենք, այսօր Երեւանում ընթանում է ՀՀ Ազգային ժողովի եւ ՌԴ Դաշնային ժողովի միջեւ համագործակցության միջխորհրդարանական հանձնաժողովների 39-րդ նիստը, որին մասնակցում են ՌԴ Դաշնային խորհրդի նախագահ Վալենտինա Մատվիենկոն եւ ՀՀ ԱԺ նախագահ Ալեն Սիմոնյանը։
Մանրամասները՝ տեսանյութում
Նելլի ԳՐԻԳՈՐՅԱՆ
