«Մենք (Ռուսաստանի դաշնությունը-Ն․ Գ․) երբեք ընդդեմ որեւէ մեկի բարեկամություն չենք անում, մենք երբեք որեւէ մեկին որեւէ բան չենք պարտադրում, որեւէ մեկի վզին որեւէ բան չենք փաթաթում՝ ի տարբերություն որոշ այլ գործընկերների, որոնք հարցադրումը մշտապես պատային են դնում՝ կամ մեզ հետ եք, կամ․․․ այլ մեկի հետ չեք։ Հայաստանը սուվերեն, ինքն իրեն հարգող պետություն է եւ իրավունք ունի ինքնուրույն որոշումներ ընդունելու»,- Հայ-ռուսական միջտարածաշրջանային 10-րդ համաժողովի ժամանակ հայտարարեց ՌԴ Դաշնային խորհրդի նախագահ Վալենտինա Մատվիենկոն՝ նկատելով, որ դահլիճում միջտարածաշրջանային համագործակցության ռուս-հայկական մեծ թիմ կա եւ այս հարաբերությունների զարգացումը Հայաստանի համար ինքնագնահատականի հարց է։
Ըստ բանախոսի՝ Հայաստանը եւ ՌԴ-ն ոչ միայն հարեւաններ են, այլ համախոհներ՝ փոխադարձ մշակութային, հոգեւոր եւ արժեհամակարգային կապերով կապված, իսկ Հայաստանի եւ ՌԴ-ի համագործակցությունը ձեւավորվում է փոխադարձ հարգանքի, փոխշահավետության սկզբունքի հիման վրա։
Այսօր Երեւանում ընթանում է հայ-ռուսական միջտարածաշրջանային 10-րդ համաժողովը, որին մասնակցում է նաեւ ՌԴ Դաշնային խորհրդի նախագահ Վալենտինա Մատվիենկոն։ Նա Երեւանում է գտնվում պաշտոնական այցով։
Տիկին Մատվիենկոն բարձր գնահատեց հայ-ռուսական տնտեսական կապերը, ասաց, որ Նիկոլ Փաշինյանի հետ քննարկվել են դրանց զարգացման հեռանկարները։ Իսկ միջտարածաշրջանային համագործակցությունը ամենահեռանկարայինն ու կարեւորը որակեց՝ ՓՄՁ-ների զարգացման համատեքստում։
Կարդացեք նաև
ՌԴ-ն ՀՀ տնտեսության ամենամեծ ներդրողներից է․ ԵԱՏՄ-ի եւ երկկողմ համագործակցության արդյունքում Հայաստանում մոտ 40 ընկերություններ կան, որոնք ռուսական կապիտալով են աշխատում։ ՌԴ-ն ՀՀ տնտեսության հիմնական ներդրողներից է, ներդրումների չափը մոտ չորս միլիարդ դոլար է։
Մանրամասները՝ տեսանյութում
Նելլի ԳՐԻԳՈՐՅԱՆ
