«Հայաստանում ռուսաց լեզվին հարգանքով են վերաբերվում»,-Երեւանում, ռուսաստանցի լրագրողներին տված ճեպազրույցում հայտարարել է ՌԴ Դաշնային ժողովի Դաշնության խորհրդի նախագահ Վալենտինա Մատվիենկոն՝ հիշեցնելով եւ կրկնելով, որ խորհրդանշական է այն, որ իր այցը Հայաստան տեղի է ունենում Ռուսաց լեզվի միջազգային օրը։
Ռուսաստանցի պաշտոնյան կարծում է, որ Հայաստանի բնակչության մեծ մասը խոսում է ռուսերեն, չկա խտրականություն, արգելք եւ սահմանափակումներ, հայկական դպրոցներում կան մեծ թվով ռուսական դասարաններ, Երեւանում կա Ալեքսանդր Պուշկինի անվան դպրոց, ՀՀ ԿԳՄՍ նախարարը աջակցում է Երեւանում ռուսական դեսպանատանը կից ռուսական դպրոցի կառուցմանը։
Այս համատեքստում Վալենտինա Մատվիենկոն հայտարարեց, որ ՀՀ ԱԺ–ում տեղի ունեցած իր հանդիպումների ժամանակ քննարկվել է նաեւ կրթության ոլորտում Հայաստանի ու Ռուսաստանի միջեւ համագործակցությունը մեծացնելու անհրաժեշտությունը։ Նա նաեւ տեղեկացրեց, որ դասագրքերի կազմման մասով գործում է հատուկ աշխատանքային խումբ եւ ՀՀ իշխանություններն աջակցում են այս բոլոր գործընթացներին․ «Ակտիվորեն առաջ է մղվում ռուսաց լեզվի միջազգային կարգավիճակի նախագիծը, որը ստեղծվել է Ղազախստանի նախագահի նախաձեռնությամբ, աջակցություն է ստացել ԱՊՀ պետությունների ղեկավարների կողմից: Վեց պետություն արդեն դարձել է այս կազմակերպության անդամ, Հայաստանը դեռեւս չի վավերացրել համաձայնագիրը: Վարչապետը խոստացել է տալ հանձնարարականներ, քննարկել այս հարցը, խթանել գործընթացին»։
Հայաստանյան այցից Վալենտինա Մատվիենկոն «շատ լավ» տպավորություն է ստացել։
Կարդացեք նաև
Հիշեցնենք, այսօր Երեւանում ընթանում է հայ-ռուսական միջտարածաշրջանային 10-րդ համաժողովը, որին մասնակցում էր նաեւ ՌԴ Դաշնային խորհրդի նախագահ Վալենտինա Մատվիենկոն։ Մինչ այդ ՌԴ պաշտոնյան մասնակցել էր ՀՀ Ազգային ժողովի եւ ՌԴ Դաշնային ժողովի միջեւ համագործակցության միջխորհրդարանական հանձնաժողովների 39-րդ նիստին։ Վալենտինա Մատվիենկոն Երեւանում է գտնվում պաշտոնական այցով։
Պատրաստեց՝ Նելլի ԳՐԻԳՈՐՅԱՆԸ
