«Շատ ոլորտներ այսօր գտնվում են բավականին լուրջ ու աճող դժվարությունների ֆոնին՝ սկսած արհեստական արտաքին խոչընդոտներից՝ արտահանմանը վերաբերող, վերջացրած արտաքին միջավայրի փոփոխությամբ։ Ես բազմաթիվ մարդկանց հետ եմ խոսում, հատկապես փոքր եւ միջին բիզնեսի՝ կահույքագործներից մինչեւ տրանսպորտային ընկերություններ, հանրային սննդի ընկերություններից մինչեւ զբոսաշրջային ընկերություններ, բոլորն ասում են՝ նախորդ տարվա համեմատ կան դժվարություններ։ Եվ ստանդարտ ծրագրերը, որոնք անցած տարի իրականացրել եք, ո՞նց եք վերաիմաստավորում, որովհետեւ իրական բան է փոխվել, նախորդ տարվա համեմատ իմ նշած ոլորտներում կոնկրետ ունեն կրճատումներ»,- Ազգային ժողովում 2024 թվականի բյուջեի կատարողականի ներկայացման ժամանակ էկոնոմիկայի նախարար Գեւորգ Պապոյանին դիմեց «Հայաստան» խմբակցության պատգամավոր Թադեւոս Ավետիսյանը։
Ավետիսյանը հավելեց․ «Վեց ամիս անցել է արդեն, երբ փոքր եւ միկրոբիզնեսի հարկը ձեր կառավարության առաջարկով ձեր քաղաքական ուժը պառլամենտում կրկնապատկեց։ Դուք ասում էիք՝ ընթացքում մենք կվերլուծենք, կհասկանանք՝ արդյոք դա էֆեկտիվ էր, էֆեկտիվ չէր եւ դրան կանդրադառնանք։ Հիմա արդեն տարին կիսվել է, արդյոք դա բերե՞ց հարկային մուտքերի ձեր սպասումներին, թե՞ ամեն ինչ լավ է, այսպես կարելի է հարկային բեռը փոքր ու միջին բիզնեսի վրա շեշտակի բարձրացնել, մինչեւ մի օր դրանից էլ չունենանք»։
Պապոյանն ասաց, որ ՓՄՁ զարգացման ռազմավարություն է մշակել կառավարությունը։ «Մենք այնտեղ թիրախավորել ենք փոքր եւ միջին բիզնեսը, դրա զարգացման համար կոնկրետ գործողությունների ծրագիր ենք մշակել»,- ասաց նա։
Կարդացեք նաև
Ռոզա ՀՈՎՀԱՆՆԻՍՅԱՆ
