«Մենք տեղեկատվություն չենք վարում, թե ո՞ր քաղաքացին ի՞նչ խնդիր ունի իր գույքին հասնելու կամ չհասնելու։ Իր հողի մշակման հետ կապված որեւէ տեղեկատվություն մենք չունենք»,- խորհրդարանում, 2024 թվականի բյուջեի կատարողականի քննարկումների ժամանակ ասաց Կադաստրի կոմիտեի ղեկավար Սուրեն Թովմասյանը։
Կադաստրի կոմիտեի նախագահին «Հայաստան» խմբակցության պատգամավոր Գառնիկ Դանիելյանն էր հարցեր տվել՝ Տավուշի սահմանամերձ բնակավայրերում՝ Ադրբեջանի հետ սահմանազատում-սահմանագծումից հետո առաջացած խնդիրների մասին։ Ըստ ընդդիմադիր պատգամավորի, հայտնի իրադարձություններից հետո կադաստրային քարտեզ է փոխվել․ «Մարդիկ չեն կարողանում հողերը մշակել, քանի որ թշնամու ուղիղ նշանառության տակ են այդ հողատարածքները, բայց հարկ են վճարում։ Կան հստակ տվյալներ՝ քանի նման տնտեսություն կա, որ չեն կարողանում հող մշակել, բայց հարկ են տալիս»։
Գառնիկ Դանիելյանի հաջորդ հարցը վերաբերվում էր նրան, որ Կիրանցում 60-ից ավելի մարդիկ սեփականության վկայականներ ունեն որոշակի հողատարածքների նկատմամբ, որոնք հանձնվեցին Ադրբեջանին։ Ավելի վաղ հայտարարվել էր, որ քրեական գործեր են հարուցվել այդ դեպքերով։ Նա հետաքրքրվեց՝ կա՞ն պատասխանատվություն կրած մարդիկ եւ ի՞նչ է լինելու այն մարդկանց ճակատագիրը, որոնք ունեին վկայականներ, բայց հողերը հանձնվեցին Ադրբեջանին։
Սուրեն Թովմասյանը պատասխանեց՝ իրավական գործընթաց կա, ինքը որեւէ տեղեկատվություն չունի արդյունքների վերաբերյալ։
Կարդացեք նաև
Մանրամասները՝ տեսանյութում
Կադաստրի կոմիտեի բյուջեն 2024 թվականին եղել է 4,5 միլիարդ դրամ, կատարողականը եղել է 96,2 տոկոս է։
Կոմիտեի աշխատանքի արդյունքում, ինչպես հայտարարեց Սուրեն Թովմասյանը, հավաքագրվել է 8, 7 միլիարդ դրամ, որից 4,5 միլիարդը ծախսվել է համակարգի աշխատանքի ապահովմանը, 4,2 միլիարդ դրամ մուտքագրվել է պետբյուջե․ սա նախորդ տարվա համեմատ շուրջ 14 տոկոսով ավելի է եղել։
Նելլի ԳՐԻԳՈՐՅԱՆ
