«Ազատություն». Երրորդ օրն է՝ Լոս Անջելեսում չեն դադարում ցույցերը, որոնք սկսվեցին, երբ ապօրինի ներգաղթյալիների դեմ պայքարի շրջանակում ԱՄՆ ներգաղթի և մաքսային ծառայության աշխատակիցները ռեյդեր անցկացրին մի քանի շրջանում, և ըստ լրատվամիջոցների, ձերբակալեցին տասնյակ քաղաքացիների, որպեսզի վտարեն երկրից:
Քաղաքի կենտրոնում ընթացող ակցիաներն ուղեկցվում են իրավապահների հետ բախումներով, ոստիկանները արցունքաբեր գազ և ռետինե գնդակներ են կիրառում ցույցերը ցրելու համար, կան բերման ենթարկվածներ և տուժածներ, որոնցից երկուսը՝ լրագրող, այրվել են ավտոմեքենաներ, թալանվել խանութներ: Ոստիկանությունը քաղաքի կենտրոնը հայտարարել է «անօրինական հավաքների» տարածք, իսկ ցուցարարներին կոչ է արել հեռանալ։
ԱՄՆ նախագահի հրամանով Լոս Անջելես է ուղարկվել Ազգային գվարդիան: Դոնալդ Թրամփը, որն ընտրվելուց առաջ էր հայտարարել, որ լուրջ պայքար կմղի ապօրինի ներգաղթյալների դեմ, ասել է, որ ամեն ինչ կանեն՝ կարգուկանոն հաստատելու համար:
«Մենք զորք ենք տեղակայելու ամենուր…. Թույլ չենք տա, որ մեր երկիրը մաս-մաս անեն, ինչպես Բայդենի օրոք էր: Եթե վտանգ տեսնենք մեր երկրի և քաղաքացիների համար, շատ խիստ միջոցների կդիմենք կարգուկանոն հաստատելու համար», – նշել է ԱՄՆ նախագահը:
Կարդացեք նաև
Թրամփը նաև սպառնացել է անհրաժեշտության դեպքում ծովային հետևակ ուղարկել: Կալիֆոռնիայի նահանգապետ, դեմոկրատ Գևին Նյուսոմն ասել է՝ դա էլ ավելի է սրում իրավիճակը: Սոցցանցում նա գրել է, որ Թրամփը սպառնում է նույնիսկ այն ժամանակ, երբ ոստիկանությունը վերահսկողության տակ է վերցրել իրավիճակը: «Լոս Անջելես, մնացե՛ք խաղաղ։ Մի՛ ընկեք այն թակարդը, որը լարել են ծայրահեղականները»,- գրել է նա։
Իրավապահների գործողությունների ֆոնին Գլենդել քաղաքը հայտարարել է, որ խզում է իր պայմանագիրը ԱՄՆ ներքին անվտանգության նախարարության և Մաքսային ծառայության հետ:
Սասուն Խաչատրյան
Նյութն ամբողջությամբ՝ սկզբնաղբյուր կայքում:
