Դեռևս ՀՀ վարչապետ Նիկոլ Փաշինյանի այսօրվա գրառումը, գոնե ինձ համար, սպասելի էր հունիսի 7-ին ՀՀ առաջին նախագահ պարոն Լևոն Տեր-Պետրոսյանի կողմից Մայր Աթոռ Սուրբ Էջմիածին այցելելուց և Ամենայն Հայոց Հայրապետին իր զորակցությունը հայտնելուց հետո։ Վարչապետի ու իր մի քանի կողմնակիցների կողմից առաջին նախագահի հասցեին ուղղած սանձարձակ խոսույթն արդեն իսկ փաստում էր, որ նրանք ձեռքերը փրփուրներին գցած ինչ որ կերպ փորձում են փրկել արդեն իսկ դեպի անդունդը գլորվող իրենց վարկանիշը: Սակայն ակնհայտ է, որ դրանք անհույս ճիգեր են և որևէ արդյունք ունենալ չեն կարող: Հակառակը, ՔՊ կուսակցության վախճանը այլևս ոչ թե մոտ է, այլ արդեն իսկ իրականություն է։
Նիկոլի էությունն ու Ամենայն Հայոց Վեհափառ Հայրապետի հետ առնչվող տեղեկատվական նրա դատողությունները որևէ աղերս չունեն ո՛չ քրիստոնեության հետ և մանավանդ ո՛չ էլ հայության ու հայկականության հետ։ Հայ հանրությանը Առաքելական Եկեղեցու դեմ տրամադրելու վարչապետի ու նրա համախոհների կոչերը հավասար են քաղաքացիական պատերազմ հրահրելու կոչերին։
Վարչապետի այսօրվա գրառումից հետո, բոլորի համար արդեն պարզ դարձավ, որ խնդիրը ո՛չ թե Վեհափառ Հայրապետն է, այլ հենց Հայ Առաքելական Սուրբ Եկեղեցին։ Վստահ եմ, որ Հայ Առաքելական Եկեղեցին պաշտպանված է և հայ ժողովուրդն այլևս թույլ չի տա, որպեսզի հակաեկեղեցական ուժերը պղծեն մեր Սրբությունները։ Նա, ով կհետևի վարչապետի կոչին ու կգա Մայր Աթոռ Սուրբ Էջմիածին՝ պետք է գիտակցի, որ ինքը գալիս է պատերազմելու Հայ Առաքելական Սուրբ Եկեղեցու դեմ։
Վարչապետը փորձում է ինչ որ բաներ բացահայտել, սակայն բացահայտվեց միայն սպիտակ մորթով պարուրված իր գորշ գայլի էությունը։ Աստված է պահապանը Մայր Աթոռ Սուրբ Էջմիածնի, Ամենայն Հայոց Հայրապետի ու համայն հայության։
Կարդացեք նաև
Գենադի ՄՆԱՑԱԿԱՆՅԱՆ
